|
Reto di partido MEP ta keda vigente te cu otro siman diabierna!  STA. CRUZ -- Awor cu nos ta yegando e fecha pa e eleccion di 25 di September 2009 ta e momento propicio pa partido AVP porfin presenta na pueblo Arubano cual ta nan logro y proyectonan ehecuta durante nan gobernacion di 1994 pa 2001, p’asina un y tur por compara esakinan cu e logronan di partido MEP durante di 2002 pa 2009. Hecho ta cu partido AVP nunca pero nunca a yega di presenta na e pueblo Arubano un lista di tur nan logronan durante nan 7 aña di gobernacion (1994-2001). Esaki siguramente ta imposibel, ya cu e politiconan di AVP no por bay papia di e proyectonan, manera e garantianan miyonario, Race Track, Radar, Radisson, Interbank, Fondo Desaroyo Nobo San Nicolas, Plan di Bario etc., siendo cu tur e proyectonan aki ta mancha cu fraude y corupcion.
Pues aki nos por papia di 7 aña cu a bay perdi pa AVP y riba dje tur e proyectonan corupto aki a costa e pueblo pagador di belasting cientos di miyones di florin. Sinembargo no ta e 7 añanan aki so a bay perdi, ya cu e siguientenan ocho añanan tambe a bay perdi pa AVP, caminda e politiconan di e partido aki a critica delaster un proyecto cu Gabinete Oduber III y IV a ehecuta cabalmente pa comunidad Arubano. Hamas den historia di Aruba un partido politico a yega di vota contra y obstaculiza asina tanto proyecto cu un gobierno a ehecuta. Pues un calculacion chikito ta mustra cu en total 15 aña a bay perdi, caminda nos no por a mira den e 15 añanan (1994-2009) ningun proyecto sano y drechi ehecuta pa AVP y cu ta na beneficio di e comunidad aki. Ta pesey awor cu nos ta den recta final pa e eleccion di otro siman, partido MEP un biaha mas ta reta AVP pa presenta na comunidad Arubano un lista di proyectonan cu nan a yega di ehecuta durante e ultimo 15 añanan aki. MEP si no ta para keto, ya cu e siman aki MEP y Gabinete Oduber ta presenta un biaha mas den tur skina di Aruba su lista di logro y proyectonan y ansiosamente ta spera riba e momento pa AVP haci esaki tambe. Pueblo Arubano al momento no ta mucho interesa den e Plan fantasma ‘Aruba Ariba’, esta kico AVP lo bay haci den futuro, pero kier mira promer kico e partido berde a haci durante e periodo di nan gobernacion. After all, con un mucha di school por bay over, siendo cu su rapport ta pata pata di onvoldoende? |
