|
Mr. Xiomara Maduro, nr. 9 Movimiento Electoral di Pueblo:  STA. CRUZ -- Hoben, aki un paar di dia bo tin e libertad pa duna bo opinion pa promer biaha den forma di un voto. Cu bo voto bo tin e oportunidad pa scoge pa e partido y e persona cu abo ta haya cu por representa bo y defende bo interesnan na e mihor manera. Cu bo voto bo ta determina bo futuro! Hoben, bo voto ta un decision importante y manera cualkier decision den bida semper ta bon pa bo tuma un conseho, waak cada banda di e medaya, informa bo mes, forma un opinion pa despues bo tuma bo decision.
Cu e nota aki mi ta duna bo algun punto pa bo refleha riba nan prome cu bo tuma bo decision dia 25 di September proximo. Hoben, no ta tur cos cu ta briya ta oro. No laga t-shirt great, cu happening great y placa pa bo participa den parada yena bo wowo. Ta bon pa bo sa cu e placa aki ta bin di esnan tras di cortina y awor tambe riba podium kendenan ta biba cu e speranza pa yega na poder y busca tur forma pa saca nan inversion bek. Nan lo no tin tempo pa bo cu a deposita confianza den nan. Hoben, ningun hende lo cuestiona bo integridad, si bo integridad no ta cuestionabel. No laga ningun hende gañabo cu programa y propaganda bunita. Tin partido of persona cu mester di e cosnan bunita pa purba tapa e actonan mahos cu nan a orquestra. Un hende por bisa algo bunita, pero su intencion (su integridad) ta refleha den su actonan. Hoben, boso tur sa cu un show ta wordo forma door di e actornan y e regisseur tras di cortina. Si e show a bay malo, esun tras di cortina tambe a faya. Cu otro palabra no laga nan gañabo cu e capitan cu uniform nobo nunca a touch cu e timon di e barco. Hoben, bo futuro ta den bo man. Abo tin e oportunidad awor pa defini bo futuro. No laga otro partido hinca bo futuro den man di 27 otro pais cu ta forma parti di Union Europeo. Mi no ta bisabo esaki pa kita atencion for di e retonan cu nos ta enfrentando awor. Al contrario, esaki ta pa hala bo atencion riba e retonan cu nos lo enfrenta despues. Hoben, considera bo pasado y lo bo sa bo futuro. Ta bon pa bo puntra rond y informa bo mes encuanto e historia di politica na Aruba, sa cua ta e actornan, sa kico ta nan ideologia. Pakico, pasobra bo mester sa di bo pasado pa bo no trompica den futuro. Cu otro palabra, no laga nan gañabo cu bo no mester bay bek den pasado. E mihor profeta di bo futuro ta bo pasado. Hoben, no tin mas ciego cu esun cu no kier mira. E nota aki no ta pa gaba of desgaba un partido politico of duna nan propaganda gratis. E nota aki ta pa abo refleha riba e cosnan cu na primera vista kizas bo no ta waak, pero cu ta e berdad bon scondi. E ta e berdad cu ta duna bo e libertad pa tuma un decision consciente. Cu otro palabra, e libertad cu ta yuda bo defini bo futuro! |
