STA. CRUZ -- Comision God Bless Aruba, pa su di tres aña consecutivo a organiza un Dia Nacional di Oracion pa Aruba, e aña aki bao di e nomber: “LET YOUR WILL BE DONE”, (laga Bo voluntad sosode). E evento aki a tuma lugar na Plaza Libertador Betico Croes, dia 12 di September 2009 for di 5:00pm pa 10:00pm. E meta di e evenemento aki ta pa haci oracion y exalta e nomber di nos Dios Creador di cielo y tera y tambe gradici’E cu durante di e aña, cu E la cuida y protege nos pais y su habitantenan di desasternan natural, di crisis, di malezanan y di hopi otro circumstancianan.

Tabata tin participacion di diferente banda gospel, cada pasa un ora y musiconan local cu a forma gruponan pa sostene e canticanan y e oracionan na Dios. Sr. Ishwar Daryanani, presidente di God Bless Aruba a duna di conoce cu pa e prome evento cu God Bless Aruba a organiza na aña 2007 “E ta digno di ser alaba”, tabata tin un participacion internacional di mas o menos 30 persona. Aña pasa tabata un participacion di 7 persona di exterior cu a bin cu funcionnan especifico pa cu e evento di 2008 “Nos Tata cu ta na cielo” duranti alabanza, durante oracion y tambe pa cu e grabacion audio visual. Pa e di tres aña consecutivo, sr. Daryanani a comenta cu e bandanan gospel cu a paricipa, cada un cu un lapso di 1 ora, for di 5:00pm te cu 10:00m tabata completamente local, al igual cu cada representante religioso. E evento aki a wordo broadcast bibo for di e website GodBlessAruba.com caminda tabatin un gran audiencia, den su mayoria for di Hulanda. Den cuadro di e decision cu pueblo di Aruba mester tuma pa cu e futuro di nos pais, God Bless Aruba a extende un invitacion personal na cada lider di partido pa ta presente na Plaza Libertador Betico Croes duranti e Ceremonia Oficial di 7:00pm-8:00pm orario den cual lo trece peticion di oracion pa tur partido politico y e futuro eleccionnan sin excepcion pa via di acto di presencia of no. E Ceremonia Oficial a ser habri cu Himno di Aruba, canta pa nos talento local Xarrah Figaroa, seguidamente pa un cantica special riba steelpan toca pa sr. Nico Connor. Tambe tabatin participacion di Luigi Cortes y Kenia Daryanani. E partidonan cu a responde na nan invitacion y a haci acto di presencia riba Plaza Betico Croes tabata: (den ordo alfabetico): Sr. Max Robert, lider di Partido CURPA, sra. Evelyn Croes representante di Partido MEP, sr. Willem A. Vrolijk representante di Partido MPA, sr. Eddie Benneth representante di Partido PPA, sr. Rudy Lampe lider di partido RED. Mester declara cu a keda sin manda representante, Partido AVP, Partido Democracia Real y Partido MSI. A hiba oracion dilanti den cuadro di eleccion: sra Elizabeth Gomes, sr. Henry Granvenbeek, sra. Lisette Malmberg y sr. Jose Sophia. Un danki special di parti Comision God Bless Aruba ta bay pa tur persona, grupo religioso, bandanan gospel, musiconan y cantante, departamentonan di gobierno, comerciantenan, medionan di comunicacion y pueblo di Aruba en general cu a coopera cu nan asistencia, nan presencia, nan finanzas y apoyo of di cualkier otro manera, pa por a haci e evento aki posibel pa nos pais. Cu Dios lo guia y protege nos pueblo y nos isla stima, y cu Dios su voluntad lo sosode.