|
Cu bo voto abo ta defini bo futuro |
|
Wednesday, 23 September 2009 |
Candidata nr. 10 di MEP, sra. Xiomara Ruiz – Maduro:
STA. CRUZ -- E siman aki nos ta bay urna electoral pa nos deposita nos voto. Cu nos voto nos lo defini nos futuro. Cu nos voto nos lo defini e futuro di nos yiunan. Cu nos voto nos lo defini e futuro di nos Pais. Shonnan bo futuro, e futuro di bo yiunan y e futuro di bo Pais no ta algo pa haci wega cune. E eleccion aki locual ta den wega ta nos Status Aparte cu tanto nos a lucha pe. Shonnan no laga e lucha aki bay perdi.
No laga nos futuro bay perdi. E biaha aki ta Plan UPG ta e plan maestro. Un plan di tres letter cu nan no kier splicabo kico su consecuencia ta bay ta. Nan ta bisabo cu e no ta alcaso. Berdad, de bagazo no se hace caso. Pero ta dicon nan ta manda nan soldaatnan y hasta e capitan pa bay bisabo den media pa no worry? E contesta ta facil, pasobra e ta alcaso pa nos Pais! Locual nan no ta durf di bisa bo ta cu ehecutando Plan UPG na final di dia nos mester bay entrega bek tur locual nos tin. E mesun Status Aparte cu a yuda nos progresa como Pais. E mesun Status Aparte cu ta brinda nos como Arubiano e oportunidad pa tin voz den nos mesun un cas. E mesun Status Aparte cu ta brinda bo yiunan un futuro sigur, lo bay perdi. Dia 25 di September proximo ainda abo tin chens di defini bo futuro. Si bo bay pa e Plan UPG otro 27 Pais Europeo lo defini’e pa bo. Vota consciente, vota pa Movimiento Electoral di Pueblo. E partido cu ta lucha pa nos Status Aparte keda salvaguardia. E partido cu ta traha pa nos futuro keda un decision di nos tur. |
