Mester biba cu realidad cu placa y negoshi a dicidi ariba e cartera di ministernan y no capacidad! 

Oranjestad – Cu placa por haci hopi cos, esey ta visto riba e pida baranca aki, unda partido AVP un biaha mas a mustra cu esaki ta e caso. Cu partido AVP a priminti pueblo cu e ta kita mesora e 3% di BBO, aumenta onderstand cu 50%, cu lo no paga huur mas pa cas di pueblo, ta redobla e pensioen di viehez, tur ambtenaar lo haya indexering, cu lo baha prijs di awa, coriente, gasolin y cu lo no paga schoolgeld ni boeki mas etc, esakinan ta promesanan fofo di campaña. Tur esaki nan tin cu cumpli awor!

Ora pueblo a vota y a kere cu nombramento di e futuro ministronan ta un deliberacion interno, a resulta cu Mike y Henny Eman ya a regla cu un paar di sponsor kendenan ta e futuro ministernan. Si nos pais cu ta yen di retonan por tin un ingeniero, koppelbaas den Valero pa nos futuro Ministro di Finanzas ta suficiente indicacion cu mescos cu tempo di Tico Croes, AVP ta cla pa kibra e persona aki cu a haya hopi voto den e partido. E strategianan aki ta sali di Henny Eman, unda ya caba e sa cu bo no por pone un hende cu ta bende celular, un salesgirl pa nos futuro Ministro di Economia. E motibo cu ta haci esaki ta, pasobra esun cu tin placa ta ‘call the shots’ den AVP.

Arthur Dowers tin aña caba ta play e experto mas grandi den salubridad publico, pero awor ta un supuesto dokter di krak weso di lomba ta e unico experto den AVP cu por tin e cartera aki. Arthur mester biba cu realidad cu placa y negoshi a dicidi ariba e cartera y no capacidad! Mescos cu un homber cu tin sentencia contra dje den Fondo di Desaroyo Nobo, unda miyones a disparce, un persona cu nunca a compone nada den turismo, diripiente ta e experto den nos turismo, unda nos futuro ta. Aki bo ta mira cu sponsor a dicidi esaki. Con un homber cu ta den boeki di Elmar N.V. como ladron di coriente por maneha nos infrastructura ta algo hopi interesante pa observa di hopi serca. Aruba a kere cu AVP berdaderamente lo pone su mihor hendenan como ministro, pero a resulta cu sponsornan a determina ken ta haya kico y pa cual motibo. Tempo di parti cos y negoshi lo bay cuminza. 

Partido Movimiento Electoral di Pueblo