Oranjestad – Cada vez cu bo tende Mike Eman papia bo ta puntra bo mes cu ni awor cu e ta bay bira e proximo Ministro Presidente cu e por eleva un tiki su vocabulario stinki cu e ultimo 8 añanan el a practica. Envez di bisa pueblo cu e ta bay kita definitivamente e 3% di BBO entrante 1 di November 2009, e tin 2 siman ta papia di verf, drecha ‘dak’ di Bestuurskantoor cu material regala y ta atende cu un hala di Haitiano cu ta ‘yuda’ pa cobra despues.

Mike Eman a kere cu e so a inventa politica y cu e por keda tira skop pa loco, hasta despues cu su persona a base di engaño, mentira, manipulacion y placa bruto a gana pa promer vez den historia di AVP un eleccion. E mes t’asina sorprendi cu ainda e kier hiba e oposicion baho y vil cu el a hiba semper. Ya cu e ta reta partido MEP, nos lo habri su encyclopedia di corupcion.

Awe cu pueblo nos ta start un campaña kende Mike Eman y su rumannan ta y ki rol nan a hunga den e escandalo cu yama Interbank.

Dia 31 di December 2005 EMCO Productions N.V. tabata debe Interbank N.V. Af. 1.833.549,00 (casi 2 miyon florin). Esnan cu a para responsabel pa e debe tabata J.H.A. (Henny) Eman, G.M. Eman, Mike Eman y e ruman notario A.C. Eman. Family completo!

Dia 12 di November 1997 e banco a fia nan 2 miyon florin. Na 2004 EMCO Productions N.V. a bay bancarota! E historia financiero di e negoshi di Henny cu Mike Eman na November 2003 tabata un debe di Af. 1.833.549,00 locual ta hopi straño pa un trato previlegia di un banco, pasobra 31 december 2005 e tabata mescos, esta Af. 1.833.549,00. Cu otro palabra, familia di Henny y Mike Eman ta e unico hendenan na mundo cu ariba un debe di casi 2 miyon florin, durante 2 aña, esta 24 luna largo no a ser cobra ni a paga ni 1 cen na interes, locual no por normalmente na ningun banco na mundo, ni na Koeweit. Mas despues nos lo splica di con Henny y Mike Eman no a paga ningun interes y a fia 2 miyon florin na 0% di interes. Fin di November 2006 ainda e debe tabata mescos, esta Af. 1.833.549,00 sin ningun interes. Esnan cu a para supuestamente garantia pa paga e debenan ta: ex-promer ministro J.H.A. Henny Eman, G.M. Eman, Mike Eman y A.C. Eman. Straño di e caso aki ta con bo por para garantia pa casi 2 miyon florin di debe, mientras EMCO Productions N.V. a bay bancarota ya caba na 2004.

Dia 20 di oktober 2004 e debenan di Af. 1.833.549,00 a ser entrega na e ‘curator’. Ningun pago, pero ningun pago a ser haci. Laga nos cita textualmente kico ta para den e rapport ariba Interbank: “EMCO Productions N.V. is failliet. De lening was afgegeven onder garantie van Henny Eman. Interbank wou executeren op deze persoonlijke garantie, echter zou persoonlijk faillissement van Henny Eman betekenen, waardoor deze zich niet verkiesbaar zou kunnen stellen. Don Mansur heeft een deal gemaakt om via Interbank te herfinancieren tegen 0% zonder zekerheden. Momenteel dus geen zekerheden. Het pand waar de nieuwe EMCO inzit is van oud notaris Eman en valt buiten het faillissement van de EMCO. EMCO werd destijds tezamen met Savem gefinancierd onder borgtocht van de heer Jan Hendrik (Henny) Eman. Op de borgocht werd een beroep gedaan en onder de leiding van de heer E.F. Mansur werd toen de lening op 0% gesteld en de borgtocht van de heer Eman vrijgegeven”.

Increibel pero berdad. Con e cos aki por?

Cu otro palabra, na Papiamento crioyo: EMCO tabata bancarota. E prestamo a ser duna cu garantia di Henny Eman. Interbank kier a ehecuta e garantia, pero esaki lo nifica cu personalmente Henny Eman lo bay bancarota y e ora e no por aparece riba lista pa ser re-eligi. Don Mansur a percura pa refinancia e debe pa 0% di interes sin ningun clase di garantia. Fuera di esey a refinancia un compania di familia Eman cu ta bancarota, cu 0% di interes y sin ningun clase di garantia. Esaki yama family Mansur and friends Eman! Te hasta e edificio cu EMCO tabata aden ta di e ruman notario cu ta cay pafor di e bancarota di EMCO. “Mike Eman, duna pueblo nomber di un banco cu boso debe 2 miyon florin, unda hasta e edificio cu ta di bo ruman cu tambe ta den e deal ta cay pafor di e garantia. Hasta despues a duna liber e supuesto garantia bao di guia di E.F. Mansur. Despues a boek af, esta kita e debe di 2 miyon. Awor cu bo ta reta nos pa bisa pueblo ken boso ta, e Pandora box lo habri pakico Henny Eman a forza un instituto social manera FCCA tuma pa Af. 1,00 di familia Mansur 100 miyon florin na debe”.

Mike, ya cu bo a pidi Hulanda pa bin investiga, ata cu prueba con boso a goberna di 1994 pa 2001, anto ainda ta bay bin e debenan di 8 miyon florin na Aruba Bank, e kwijtschelding contra ley di 5.7 miyon florin di debenan di belasting. 

Partido Movimiento Electoral di Pueblo 

Aruba, 8 di oktober 2009