STA. CRUZ -- Ora pueblo a kere cu e lider di AVP Mike Eman a gana eleccion y ta bay prepara con e ta bay cumpli cu entre otro e kitamemento di BBO di 3%, su team di gañador a keda mescos cu den campaña, esta instiga, gaña, manipula y no bisa nada serio. Hecho ta cu e lider di AVP y futuro Ministro Presidente tin 3 siman caba ta ocupa su mes cu Bestuurskantoor y cu material di construccion supuestamente haya pornada y Haitianonan ilegal ta wordo priminti cu nan lo bira legal. Tur esaki envez di bisa pueblo ki dia definitivamente e ta kita e 3% di BBO y baha drasticamente costo di bida.

Envez Mike Eman como formador prepara un programa pa ataca e retonan y e problemanan, e ta anuncia su hendenan como ministronan, kendenan no ta ministeriabel, cu tin conflicto di interes cu nan funcion y kendenan no ta experto den e cartera cu nan lo bay ocupa. Un futuro Ministro Presidente cu a gaña e empleadonan di Valero cu e promer siman despues di eleccion e ta bay Mexico cerca su amigonan di PEMEX pa habri e refineria atrobe y te awe e tin 3 siman ta papia solamente di e dak cu ta lek, menos cu e ta bay habri e refineria. Awor cu no tin capacidad pa habri esaki, e caha di engaño a habri atrobe, cu ta pa motibo 1% di BBO ariba exportacion e refineria a cera y cu tin un deal cu nan pa paga solamente 50 miyon florin, locual atrobe e ta gaña. “Mike Eman, e empleadonan di Valero kier tende ki dia bo ta bay Mexico cerca PEMEX y no kier tende mas di bo engañonan”.  Cu e refineria no ta paga ni un cent na belasting ta danki na e carta di Mike Eman su gobierno di dia 30 di Juli 1998, caminda a duna e refineria tax holiday di nobo te cu fin di 2010. E refineria mester a cuminza paga Winstbelasting na 2001 y si nan no a duna nan contra ley tax holiday, cu desde 2004 pa 2007 e refineria a gana 2.7 biyon florin, lo nan a paga na Aruba Af. 926.000.000,00. Cu nan no a paga ningun cent, esaki Mike y Henny Eman so por splica of esnan den Cas di Partido ora e botin a ser hiba pa nan. Con Mike Eman despues di gana eleccion kier keda gaña ariba Nel Oduber y su gobierno cu pa via di solamente 1% di BBO, e refineria ta cera y cu nan lo a keda habri, si nan no mester a paga y cu e 200 miyon florin cu tin den escrow account kitando e 150 miyon florin cu Mike Eman di cu nan kier paga, e refineria a cera su portanan pa solamente 50 miyon florin. Bo ta haya sa con manipulador, gañador, instigador un futuro Ministro Presidente ta ora bo bolbe gar’e ta gaña organiza y structura. E refineria ta cera, pasobra ora Valero a gana 2.7 biyon florin e no a inverti pa flexibiliza e refineria y cu debi cu Mexico a kita e discuento ariba e heavy sour crude, e ta perde placa, pasobra ariba cada bari cu nan rafina, segun Valero e ta perde hopi placa.

Straño cu tur e refinerianan di Valero na Merca tambe ta ‘idle’ of cera, cu a stop 2 proyecto di hydro cracker, cu a kita 250 empleado etc., tur ta pa motibo di 1% di BBO na Aruba. Cualkier hende subi internet e por lesa kico ta pasando cu Valero y refinerianan rond mundo. Mike, bo ta bolbe gaña cu Valero kier a paga 50 miyon florin. Esaki no ta berdad. Valero tabata kier pa kita tur inversion, afschrijving etc. y si tin perdida manera tin awor, lo e ser kita di e placa ey tambe. Cu otro palabra, mester haya tur persona bobo, ignorante di berdad pa bo kere cu Valero lo paga 50 miyon florin, pasobra despues di kita tur nan inversionnan, nan perdida etc. nan atrobe lo no paga ningun cent, mirando cu pa tene e refineria habri mester inverti hopi di biyones di florin.

“Mike Eman, bay kita e 3% di BBO, bay baha costo di bida, aumenta onderstand cu 50%, redobla pensioen di viehez, kita schoolgeld y paga na e boekenfonds, kita e huur di cas di pueblo y porfin stop di haci wega y bay traha envez di para gaña atrobe. Campaña a caba, bay traha y stop di gaña atrobe”.