STA. CRUZ -- Relaciona cu e refineria Valero, pa partido AVP, ATIA, Camara di Comercio y FTA mes a opone na 2008 ora cu gobierno tabata discuti cu Valero. E refineria nunca a paga belasting na Aruba. Ora cu e tax holiday ta bay caduca na 2001, AVP riba 30 di Juli 1999, den persona di Henny Eman hunto cu sr. Mike Eman a duna e refineria 3 biaha 10 aña di nobo tax holiday, cu ta te na 2011 e refineria aki lo bay paga winstbelasting na Aruba.  Nunca e refineria aki a paga winstbelasting na Aruba, ni Coastal, ni El Paso, ni Valero. E gobierno di MEP a cobra Valero solamente 1% riba export cu te awe Valero a paga un cent.  Por ta dia 16 di Oktober lo por haya tende si e 90 miyon cu Valero lo mester paga pa aña, cu ta 200 miyon cu tin riba ascrow account, e gobierno lo haya esaki. PEMEX di Mexico y PDVSA a kita e descuento riba e heavy sour crude. Di 2008 hopi refineria na mundo, incluyendo e refineria na Aruba ta pasando den problema ora a kita e descuento, pasobra e diferencia entre e bon petroleo y e petroleo menos bon cu ta e ‘heavy sour crude’ a wordo kita.

Segun informacion di Valero mes, nan a perde hopi placa na 2008 y na 2009 tambe, te cu Valero a idle e refineria. Valero di 2004 pa 2007 a gana 2.7 biyon florin na Aruba y danki na gabinete Eman Valero a paga 0 florin na belasting. Segun sr. Oduber si Valero mester a paga winstbelasting, nan mester a paga 926 miyon florin. Si gobierno por a haya e placa ey lo por a haci hopi mas na Aruba. Sea sr. Eman ta bobo of e ta ignorante y si sr. Eman keda keto no ta haya sa con bobo e ta den asunto di refineria. Sr. Bill Klesse a ofrece Minister di Finanzas y Prome Minister di Aruba 50 miyon dollar, pero ora sr. Klesse a bay Merca el’a cambia e suma aki pa 50 miyon florin. Pero sr. Klesse a manda gobierno di Aruba un carta pa condiciona e suma aki na investeringsaftrek, cual ta significa cu tur inversion cu Valero a hinca den e refineria lo ser kita for di e suma di 50 miyon florin aki plus afschrijving plus cu si Valero tin perdida manera cu nan tabata tin na 2008, lo kita esaki tambe for di e 50 miyon florin. Gobierno di Aruba a pidi expertonan di Alemania pa duna gobierno di Aruba un conseho. E conseho na gobierno tabata cu si gobierno di Aruba acepta e condicion aki, e gobierno di Aruba lo ricibi 0 cent na belasting. Pasobra manera cu e negoshi di petroleo ta, cu ta perdida Valero tin y cu e condicion di e refineria cu mester haya hopi inversion, lo significa cu Aruba lo haya 0 cent di belasting. Esaki ta mustra cu sr. Eman ta gaña y manipula pueblo, pasobra e 50 miyon cu sr. Eman ta papia di dje ta significa cu Aruba lo haya 0 cent. Sr. Eman ta nenga di bisa pueblo cu den e carta di sr. Bill Klesse ta poni investeringsaftrek pa tur inversion, afschrijving y si tin perdida e suma aki ta ser kita. Mirando cu Valero a perde hopi miyon na 2008 y 2009, mester pone un fin na gañamento di sr. Eman. Sr. Eman mester splica pakico nan a duna e refineria tanto aña di tax holiday y kico tabata tin eytras. E mester splica pueblo cu el’a priminti cu e tin deliberacionnan cu PEMEX di Mexico y riba e dialuna despues di eleccion e lo a bay Mexico, anto awor e ta bay pidi gobierno di Hulanda pa interveni pa traha un cita pa waak si e ta bay papia cu Mexico, pa papia cu PEMEX tambe ta den problema financiero. Sr. Oduber ta haya cu awor sr. Eman mester bay traha pa e comunidad envez di wak lek na e dak di ex-bestuurskantoor.