Cas pa cas AVP a pasa gañando e hendenan cu Hulanda lo bay investiga e ministronan di MEP y cu lo sera tur di nan. Cu tur e mentira-, engaño- y blasfemianan aki AVP a logra gana e eleccion di 25 di September. AVP a bisa cu Hulanda mes lo investiga Nel Oduber y su gobierno. MEP no tin miedo di ningun investigacion, pero lider di MEP a bisa cu si Hulanda - di acuerdo cu articulo 43 inciso 2 - kier bin investiga con nos estado di derecho y nos democracia ta funciona, cu nos no tin nada contra. Si nos a bisa acerca cu Aruba ta un pais autonomo den Reino Hulandes cu su propio Ministerio Publico cu di acuerdo cu nos leynan su podernan ta regla den nos leynan. Hulanda no tin nada di bisa ni comanda den nos Ministerio Publico, pero ta e Procurador General y esun politicamente responsabel pe kende ta e Ministro di Husticia. AVP a keda gaña pueblo cu Hulanda lo bin investiga e ministernan di MEP pa corupcion. E Secretario di Estado, esta sra. Ank Bijleveld a coopera cu AVP pa sigui gaña pueblo. Awe e propio Ministro Hulandes di Husticia, sr. Ernst Hirsch Ballin a bisa literalmente: “Ningun momento ta intencion di Hulanda pa bin persigui gobernantenan na Aruba, pero ta cierto funcionnan di gobernacion”. El’a bisa mas aleu cu no ta intencion pa haci e trabao di Ministerio Publico na Aruba of saca esaki for di man. Aruba tin un Ministerio Publico cu ta funciona door di funcionarionan hopi bon. Como tal, no ta asina cu kier hibe den un discusion asina of direccion asina. Cu esaki e Ministro di Husticia di Hulanda a pone un fin na e engaño y mentira di Mike Eman, esta cu lo bay investiga e ministronan di Gabinete Oduber pa corupcion. Pueblo Arubano, ni con grandi e mentiranan di AVP tabata den campaña, e berdad a alcans’e na caminda y atrobe nos a gara Mike Eman ta gaña. Mescos cu Mike Eman no ta bisa pueblo cu den e situacion financiero di Aruba tin tambe e contribucion di Gabinete Oduber na e Fondo di Pensioen di ambtenaarnan (APFA), unda debi na e mal inversionnan di fondo den exterior, a perde mas di 200 miyon florin, unda cu esaki a trece pa nos gobierno un obligacion extra di nada menos cu 20 miyon florin na e primanan cu mester ser traspasa pa APFA. E prima cu gobierno mester a paga awor a subi di 31% te na 41.5%, esta un aumento di 10.5%. Esaki si e lider di AVP Mike Eman no ta bisa pueblo, pasobra e tin cu gaña y instiga atrobe.