Esaki mas cu 50 aña largo gobierno Hulandes a accepta pasobra nos ta un isla di apenas 110.000 habitante y Hulanda tin 16 miyon hende. Hulanda mes sa cu un binimento masal di Hulandesnan Europeo lo mata nos mercado laboral y cu nos por wel di sera nos Departamento di Labor. No lubida cu nos teritorio ta apenas 193 km2.E concepto di Rijkswet ta pa laga tur Hulandes Europeo drenta sin ningun restriccion nos pais pa traha. E concepto di Rijkswet aki ta inicio pa hinca nos pais den UPG, unda nos lo perde nos autonomia completamente. Hulanda su gobierno ya caba a pone den pasado den nan programa di gobernacion cu Aruba lo ser yuda pa drenta UPG, sin cu nunca nos gobierno a pidi pa esaki. Locual si nos a pidi Hulanda pa haci ta pa ban discuti e kitamento di e placa di ayudo pa desaroyo cu nunca nos Parlamento ni nos pueblo aproba pa nos no haya nada mas di ayudo despeus di 2009. Hulanda ta haci locual ta conveni politicamente y no den nos concepto locual ta bon pa nos. Pero mirando e metemento den nos asuntonan interno ta mas cu logico cu gobierno Hulandes tin caminda habri pa haci tur locual cu nan kier cu nos isla, locual no tabata por cu Gabinete Oduber. Mirando cu cada pueblo ta haya e gobierno cu e ta escoge, nos trabao lo ta di señala, detecta y actua na nos manera como e futuro oposicion.