Lider di AVP Mike Eman gara ta gaña atrobe!

STA. CRUZ -- Tanto cu e lider di AVP y futuro Ministro Presidente Mike Eman a gaña pueblo henter campaña cu ta pa motibo di e 1% di BBO riba export, e refineria na San Nicolas a cera, awor e mes tin cu guli tur su mentiranan. Tur hende por corda ainda con e  Mike aki a declara cu e e mesun dialuna despues di eleccion e lo bay cerca su amigonan di PEMEX y Presidente di Mexico Calderon y cu e lo percura pa habri e refineria.

Awe 4 siman despues di eleccion – fuera di mendiga pa clabo, verf y lapi e dak di Bestuurskantoor cu ta lek – nada ta ser bisa door di Mike Eman ki dia e ta kita BBO y ki dia e ta bay cerca su amigonan di PEMEX pa habri e refineria, manera cu el’a priminti. Awor ata e ta pidi Hulanda pa bay habri caminda na Mexico pa busca un cita cu PEMEX y pa bay discuti pa kita e decision pa no duna discuento ariba e ‘heavy sour crude’ y hasta ta priminti di bin cu partnership cu e compania di estado. Cu Mike Eman ta gaña atrobe, nos a constata, cu si Valero a cera pa motibo di e 1% di BBO ariba export, anto Mike Eman mester prepara e ley pa kita e BBO entrante 1 di November 2009, manera cu un biaha mas el’a gaña e pueblo. Straño cu awor si e no ta bisa cu e ta kita e 1% di BBO pa habri e refineria, pero ta bay yora cu Hulanda pa bay traha un cita p’e cu PEMEX. Di con Valero no a bisa Mike Eman cu si e kita e 1% di BBO, e lo bay habri e refineria, pero awor ta trece padilanti cu e ceramento di e refineria ta meramente pa razonnan economico di negoshi y cu no tin margen di ganashi! Di con Mike Eman ni Valero a bisa esaki durante campaña?  E rekensom di Mike Eman, cu si a tuma e deal di 50 miyon florin, esta 200 miyon florin kita 150 miyon florin lo a keda 50 miyon. Mike Eman ta ‘lubida’ di bisa acerca cu e 50 miyon florin di Valero ta mara na investeringsaftrek, afschrijvingen y si tin perdida manera aña pasa y e aña aki, anto pais Aruba lo no haya ningun cent preto. Mike Eman por gaña hopi hende, tuma nan haci chambon pa gana eleccion, pero e no por keda gaña awor cu el’a gana eleccion. Bira serio, stop di yora y bay traha! E empleadonan di Valero, e contratistanan y e otro trahadornan a fada caba di e engañonan di Mike Eman. A bira tempo pa e bisa e berdad, cu Valero mes no a inverti den modernisacion di e refineria y hamas kier a duna gobierno un schedule cu datonan concreto di kico ta bay inverti a base di un ‘firm commitment’. Valero semper a hunga wega politico di gaña cu nan kier paga 50 miyon florin, pero mescos cu Mike Eman nunca nan ta bisa acerca cu nan kier investeringsaftrek, afschrijvingen etc. Laga Mike Eman kita e 1% di BBO ariba export pa caba, anto laga Valero declara cu mesora e lo habri e refineria sin ta pidi pa atrobe no paga nada na belasting. MEP lo vigila di hopi cerca e gañamento di Mike Eman hunto cu Valero. “Mike, campaña a pasa caba. Stop di gaña atrobe y cumpli awor cu bo promesanan falso haci na bo 26 mil votadornan”.