|
Gabinete Oduber ta laga un industria di turismo sumamente grandi, positivo y alentador atras |
|
Monday, 19 October 2009 |
|
Proyectonan grandi y positivo ta visto pa un y tur: 
STA. CRUZ -- Un di e issuenan cu partido AVP tambe a usa pa gana e eleccion ultimo ta e asunto di desaroyo den nos turismo. Dirigentenan di e partido aki y en especial e tal Otmar a lanza un gran cantidad di acusacion y mentira den direccion di nos Minister di Turismo Edison Briesen, bisando entre otro cu nos turismo ta bayendo sumamente malo, cu no ta wordo inverti den turismo, cu nos minister ta drumi, cu nos minister ta blo viaha so y cu 5000 (?) trahador den e sector aki a perde trabao caba etc. Awe nos tur por mira con e mesun Otmar aki ta bay na rudia cerca Minister Briesen pa pidi ayudo y conseho con mester maneha e industria di turismo.
Hecho ta cu sr. Edison Briesen cu su experencia y profesionalismo di 13 aña como Minister di Turismo ya a crea un bon nomber localmente y den exterior, cu sa kico ta come y bebe den e industria aki y pa awor un chabelito inexperencia manera e tal Otmar ta bay mors den pia di e ehecutivonan halto den turismo y aviacion. Sinembargo pueblo a wordo malamente engaña door di e politiconan di AVP den e eleccion ultimo, esta cu nan tabata instiga cu nos turismo ta bayendo atras drasticamente y cu e industria aki ta den un crisis serio. Cifranan concreto a mustra cu na 2008 nos a ricibi un cantidad record desde Status Aparte di mas di 826 mil turista y esaki ta danki na e vision y capacidad di un gobierno cu a traha incansablemente pa eleva e pilar economico di mas importante di nos pais. Alavez nos turismo crucero a cera 2008 cu mas di 566 mil turista. Hecho ta cu den e promer mitar aña di 2009 nos turismo a conoce un caida leve y esaki ta debi na e crisis y recesion mundial cu a afecta practicamente tur pais na mundo y Aruba no tabata un excepcion. Sinembargo nos a logra tene cabez riba awa y den e ultimo simannan nos por a tende solamente noticianan positivo pa loke ta e futuro di nos turismo: 1. Aruba Airport Authority N.V. a raporta resultadonan di trafico positivo pa e di tercer cuartal di 2009; e ‘revenue generating passengers’ y e ‘air service capacity’ a aumenta cu 2.8%, resp. 1.8%. No mester lubida cu e cifranan di e segundo cuartal di 2009 tambe tabata sumamente alentador. 2. Na final di Oktober 2009 pais Aruba lo ta anfitrion di SITE University y cual evenemento lo conduci na un tremendo adelanto den nos industria di turismo. Esaki ta di dos biaha caba cu SITE University ta ser teni na Aruba y den ambos ocasion esakinan a tuma lugar durante cu gobierno di MEP ta na mando. 3. E compania di aviacion AirTran lo bula pa Aruba cuminsando dia 19 di December 2009 for di Atlanta y entrante 13 di Februari 2010 for di Orlando. 4. Pa sigui diversifica e mercado di turismo tur tramite ya ta cla haci caba pa ricibi e promer vuelo charter for di Suecia pa Aruba. Alavez esaki lo trece cu ne cu mas turista di calidad lo bin pasa nan vakantie na Aruba. 5. Pa otro aña y tambe na 2011 y 2012 haf di Aruba lo haya bishita di 16 barco crucero, esta di Carnival Miracle cu siguramente ta un empuhe grandi pa nos industria di turismo crucero. 6. Tur e plannan ta hopi avanza caba pa muda e haf industrial pa Barcadera y pa crea un bunita area turistico na e haf di Oranjestad, cu su marina y su hotel di 5 strea, esta Grand Melia. 7. Alavez e hotelnan di calidad di 5 strea, manera Ritz Carlton na Palm Beach y Fairmont na Seroe Colorado ta cla pa wordo ehecuta. Tur e desaroyonan positivo aki ta danki na e trabaonan grandi desplega pa Gabinete Oduber y su Minister di Turismo Edison Briesen y ta pruebanan palpable cu nos gobierno aki paar di siman lo laga un situacion sano y alentador atras den nos industria di turismo. Sinembargo laga nos spera cu e gobierno nobo lo continua cu e vision y tur e plannan aki y cu nan lo no laga nos turismo na werki, manera cu gobierno di MEP a haye na final di 2001. After all, nos tur tin cu percura pa no mata e galiña cu ta pone e webo di oro y cual ta nos industria di turismo. |
