|
STA. CRUZ -- Durante 8 aña Mike Eman a lastra y critica tur e ministernan di MEP, acusando nan di ‘friends and family’, cu ta paga abogadonan, huur edificio di familia, ta nombra rumannan den gobierno, ta duna contrato na hendenan cu ya a haci 60 aña etc. Tur dialuna tabata e mesun disco raya y mas engaño ta ser presenta. Awor cu placa y engaño, promesanan falso, blasfemia, redashi, ataque personal a pone cu AVP a logra gana eleccion, nan lo mester por comprende cu ta nan mes a drenta e ‘kashi di glas politico’.
Pa cuminsa, ainda nan tin debe na e Mansurnan y Diario di 2 miyon florin sin interes y 1 miyon florin di AVP sin nunca a paga esaki. No lubida cu ta Lotto pa Deporte e doño di Diario kier y un hala di tereno di gobierno. Plus fix su debenan astronomico di belasting. No lubida cu e politiconan di AVP a trata na 2001 ainda pa paga lomba cu lomba pa tur e criticanan lanza contra MEP, esta cu e doño di e matutino lo a haya e permiso pa Lotto, te cu huez na 8 ocasion a bati su dede formalmente, ya cu esaki ta contra ley. Mescos ta e caso cu e exoneracion di casi 6 miyon florin di debe di belasting cu ta conoci cerca e doño di e matutino y cu ta pesey nunca nan a cobr’e, pasobra un man ta laba otro. Con bo ta kere cu Mike Eman, Benny Sevinger y Jossy Mansur lo trata Tele Aruba, pasobra ta nan ta doño di AVP Televisie? Lo bo bay mira cuanto placa pa luna e gobierno di Mike Eman lo tin na AVP Televisie! Tempo ta sigur na nos banda. E otronan ta envolvimento cu Real Estate, manera den pasado cu nos ta bon na altura di nan. Benny Sevinger lo ta e ministro di Infrastructura, DOW etc. Ken no sa cu AVP durante nan gobernacion a cera garashi di DOW, pasobra e ta costa hopi placa, anto a pasa esaki cu contratonan pa drecha auto di gobierno pa un garashi ‘friend’ cu a costa DOW 3 vez mas hopi. Nos tin sigur cu aki Benny Sevinger lo tin cu cumpli cu su sponsornan amigo. Alavez Benny lo bay duna tereno y tur hende sa cu e cu un amigo tin un lugar di pinta mapa, esta SHS. E structura lo bira cu bo ta haya tereno, pero nos lo mester pinta e mapa, anto aki e placa ta cuminsa lora. Benny, bo a acusa MEP 8 aña largo di corupcion cu tereno etc., pero nos sa cu bo meta ta pa aplica e structura ariba menciona. For di ken abo lo kere cu e gobierno di AVP lo cumpra auto? Con bo ta kere e gobierno di AVP lo trata SETAR, unda cu Digicel tabata meti completamente den campaña? Djies para observa y saca bo propio conclusion! Ken lo mata nos compania nacional SETAR? Ken abo ta kere cu contratista ya ta para cla pa drenta den e refineria? Con bo ta kere e cos aki lo bay? Kico abo ta kere cu AVP lo bay haci cu e proyecto di mudamento di e haf pa Barcadera? Kendenan a pone placa den wega pa eleccion? Con bo ta mira e futuro di FCCA, fundacion social pa traha cas pa pueblo? Lo e bolbe bira un negoshi comercial, cu e mesun structura manera tempo di AVP cu a cumpra e terenonan na Moko pa hopi placa, bende esakinan barata cu amigonan y traha casnan miyonario riba custia di pueblo. E Pandora box di Gabinete Eman lo ser habri atrobe, unda e corupcion tabata tey pa tur cu kier a comprende con cos a bay. Kico abo ta kere cu ta bay pasa cu Serlimar y e proyecto di Dump? Djis para observa e movimentonan! Por ultimo, ta cual futuro Minister President a bisa su hendenan cu ta pa solamente 4 aña e kier bira ministro y despues e lo no traha nunca mas? |
