E midi cu AVP a midi MEP, cu e mesun midi aki nos lo midi nan!

STA. CRUZ -- Partido MEP por a tuma nota di e ultimo reaccionnan sin pia y sin cabez di Barba Herde di AVP, den cual e ta scupi su gal berde contra nos partido MEP y haciendo como sifuera cu e politiconan di AVP ta señoritanan cu nunca a yega di kibra un koppi den politica. Diripiente Baba Herde ta yora cu nos lider Nelson Oduber y otro politiconan di MEP ta lanzando constantemente critica den direccion di AVP y nan futuro ministronan. 

“Haallloooo, Baba. Stop di baba den bo soño. Lanta ariba y realiza cu awor partido MEP ta den oposicion y cu nos tin tur libertad di mundo pa critica tur dia e maniobranan falso y mentiroso di boso partido AVP cu a gana e eleccion ultimo den un forma vies door di haci promesanan falso na e pueblo votador”.  Partido MEP ya a cuminsa fada di e yoramento sin fin di e politiconan di AVP cu awe ta yora cu nan lo bay drenta un gobierno den cual tin un deficit di apenas 97 miyon florin y cual a ser ocasiona grandemente pa e recesion mundial cu tambe a afecta nos pais.  Hopi biaha e politiconan mediocre di AVP no kier pa nos waak patras, pero na cada ocasion nos di MEP si ta bay un rato den historia pa mustra pueblo con Gabinete Oduber a haya e pais aki na final di 2001. Den un solo palabra: Un berdadero disaster!  1. Gabinete Oduber III a haya deficitnan den e presupuestonan di 2001 y 2002 laga atras pa e gobierno di Baba cu ta suma en total na 374.1 miyon florin; 2. Gabinete Oduber III a haya na Oktober 2002 un sentencia di Corte Internacional na Den Haag, den cual nos gobierno mester paga di inmediato (‘uitvoering bij voorraad’) 206 miyon dollar (400 miyon florin) di e debenan di garantianan duna door di AVP na e Mafianan Italiano; sinembargo nos gobierno a negocia na Italia y a logra baha e debenan aki te na 110 miyon dollar. Di e suma aki ya nos gobierno di MEP a logra paga 154.3 miyon florin te cu 31 di Maart 2009, pero falta pa paga ainda un suma total di 82.9 miyon florin cu ta core te cu 31 di Maart 2018. “Baba, ta con bo kier pa nos di MEP y e pueblo Arubano lubida boso bagamunderia escandaloso relaciona cu e debenan di e garantianan duna na e Mafianan Italiano?”

3. Gabinete Oduber III a haya un disaster relaciona cu e proyecto fantasma di Race Track y mester a paga 50 miyon florin pa un pista riba cual ningun auto di careda Match Box a core; 4. Gabinete Oduber III a haya un Fondo Desaroyo Nobo San Nicolas na werki, yena cu fraude y corupcion y di cual 52 miyon florin a cria pia. Debi na espacio partido MEP lo no sigui amplia riba tur e otro proyectonan fraudulento y coruptivo di Gabinete Eman y partido AVP, pero e 4 casonan menciona so ta suma na mas o menos 875 miyon florin cu Gabinete Oduber III a hereda asina cu el’a drenta gobierno na final di 2001. Sinembargo nos partido no a sinta yora. Nos a lora manga di camisa y a soluciona practicamente tur e debenan aki cu partido AVP a laga atras. Pero kico nos ta mira awe? Un set di politiconan yoron y den cual Baba Herde tambe ta pertenece, ta grita y sclama pa un deficit di apenas 97 miyon florin y cu MEP mester cera su boca y laga partido AVP goberna den tur trankilidad. Sinembargo cerca MEP e flie aki lo no subi. E mesun midi cu AVP a midi nos durante 8 aña largo, e mesun midi nos lo midi nan den e añanan nos dilanti! Si for di awor caba e politiconan manera Baba ta yora relaciona cu e tiki atakenan cu te awor a wordo lanza door di MEP, ta con nan lo haci ora cu e atakenan fuerte y feroz mes cuminsa ser lanza den nan direccion?