|
Cu apenas 313 voto y di cabey boto den Parlamento: STA. CRUZ -- Un locura y payasada completo ta locual henter comunidad por a mira den e ultimo simannan aki pa loke ta e fraccion mediocre di AVP den Parlamento. Alavez ta visto cu aki ta trata di un grupito inexperencia cu di golpi a kere cu nan por haci y deshaci den e Parlamento Arubano, sin cu ningun hende tin algo di bisa nan. Y riba dje nos ta haya un lidercito di fraccion, esta Baba Herde cu ta haci como sifuera cu e ta un gran parlamentario cu hopi experencia y astucia politico, pero cu en realidad no ta compone nada den e organo di mas halto den nos pais.
Ta un verguenza pa mira un charlatan politico kende cu su apenas 313 voto ta kere cu e por cera boca di henter oposicion den Parlamento y kende ta haci como sifuera cu su palabra ta ley den Parlamento. ‘He dicho’ y tur hende manera carne mester cra su boca! Siman pasa Baba Herde a declara cu e no kier duna ningun presidencia di e comisionnan di Parlamento na MEP, ya cu e no ta confia e fraccion di MEP, siendo cu tur hende na Aruba ta na altura cu e unico partido cu no ta di confia ta e partido berde di Baba. Historia a demostra caba kico nan a haci na 1948 ora cu nan a pone e famoso cadena di esclavitud di 12-8 rond di garganta di Aruba, alavez nan actitud traicionero na momento cu nan a nenga di forma parti di e gobierno nacional cu nos Libertador Betico Croes kier a bin cune na 1985 ora cu Lago a cera su portanan y pa no lubida e man cu nos lider Nelson Oduber a saca pa nan na 1994 ora cu un biaha mas MEP tabata dispuesto pa forma un gobierno cu AVP. Pues ora cu Baba Herde kier papia di inconfiabilidad, e mester busca esaki den su propio seno of talvez e por laga familia Eman duna su persona un lectura completo con mester confia otro den politica na Aruba. Awor e siman aki Baba Herde a lanta di remate cu un otro locura, ya cu awor su so kier bay dicta y trece cambio den e custumbernan di antes den Parlamento y alavez formanan nobo di traha di e 21 parlamentarionan. Pues Baba kier bay dicidi tambe pa e 8 miembronan di MEP con nan mester traha den Parlamento. “Baba, bay fliet y stop di papia tanto soketada asina y demostra con bobo bo ta den politica”. Ocho aña largo e dormilon aki tabata morto na soño den politica na Aruba y nunca el’a yega di hala horea di su coleganan di AVP den Parlamento di e forma con nan tabata canga saya den sala di Parlamento, con nan den forma dictatorial a bay sinta riba stoel di e Presidente di Parlamento, e cantidad di biahanan cu nan tabata briya cu nan ausencia na reunionnan di Parlamento, con polisnan cu man fuerte mester a saca e bochincheronan di AVP for di sala, con nan tabata usa palabranan sushi y vulgar, hasta contra e damanan parlamentario di MEP y con nan a vota contra TUR pero TUR proyecto cu ta na beneficio di e pueblo Arubano. Awe Baba kier aparenta di ta e gran moralista cu sa precisamente con Parlamento mester wordo dirigi y asina e kier bay sinta tambe riba stoel di su colega Presidente di Parlamento Andy Lee. Awor cu di cabey boto Baba a caba di drenta Parlamento, e kier demostra na mundo henter cu e tambe ta un gay chogogo politico cu tur hende mester tene cuenta cu ne. Ta increibel con e mini-politico aki cu su apenas 313 voto (tin 5 parlamentario di AVP cu tin mas voto cu e charlatan politico aki!) ta kere di por ‘snoer’ boca di e fraccion di MEP y alavez ta kere cu e por midi su capacidad politico cu e lider di fraccion di MEP, esta Booshi Wever cu tin casi 5 biaha mas voto (1441 voto) cu e enano politico aki. Na Hulandes tin un dicho cu ta bisa cu ‘in het land der blinden is éénoog koning’, pero den e fraccion di AVP, esun di mas di chikito den tamaño y capacidad politico kier sobresali y briya cu su boca grandi den Parlamento. |
