|
8 aña largo a gaña pueblo cu tin solucion pa tur problema STA. CRUZ -- Despues cu Mike Eman a pasa 6 siman ta papia solamente di clabo, palo, dak, verf etc. pa loke ta su promer proyecto, esta e lapimento di e edificio di Bestuurskantoor, awor el’a cuminza pronk cu tur e plumanan di Gabinete Oduber. Danki Dios na e proyecto di compra di 11 bus for di China pa nos compania nacional Arubus N.V., e conferencia turistico internacional ‘SITE’ y e vuelo di charter for di Suecia, e tal Otmar tabata tin algo di haci den e ultimo simannan. Hecho ta cu e tal Otmar te ainda ta groggy di locual familia Eman a bis’e, esta cu e no ta ministeriabel, pa despues ora cu a pone presion, a haci’e toch ministro cu orden pa persigui e hendenan di MEP.
Como olifante Otmar por a pasa door di wowo di hangua y lo a scapa, pasobra e lo no a mira ni tende nada, pero awor como ministro di AVP a dun’e linia pa nan mes corta esaki despues. Time will tell cu el’a bira ministro contra nan plan traha cu e grupo di sponsornan. Si no ta pa e proyecto di Gabinete Oduber di molina di biento, Mike Eman lo a keda hunga domino cu e supuesto voluntarionan cu a lapi e Bestuurskantoor bieu. Imagina bo cu e tabata tin asina hopi tempo sin traha, cu ora siman pasa na Vader Piet tur invitado y obrero a haya un helm y a bistie, e bad Mike a cana ta hunga cu e helm den su man, pasobra e no tabata sa kico haci cu ne. Partido AVP a goberna di 1986-1989 y 1994-2001 y nunca nan a haci nada pa WEB N.V., cu excepcion di kier a muda e planta di awa/electricidad pa e tereno contamina di e refineria. AVP den gobierno nunca a haci nada pa busca energia alternativa, pasobra ora nan ta den gobierno ta blo ariba proyectonan pa yena nan saco, nan tabata pensa manera Fondo Desaroyo Nobo San Nicolas. Bestuurskantoor a bira un centro di estudio pa tur cos, unda hasta pa cera e shelter Mike Eman a ordena 3 ministro pa den 30 dia bin cu un solucion, despues cu nan tin 8 aña ta gaña pueblo cu nan tin solucion pa tur cos. Mirando cu Gabinete Eman ta sinta duim y hunga domino henter dia, awor nan kier crea un issue di obesidad. Pueblo a duna nan 12 miembro den Parlamento cu te awe ta un cos so nan ta papia di dje cu ta obesidad. Falta pa AVP pa falta di profundidad bisa cu ta pa via di Gabinete Oduber hopi hende ta gordo na Aruba. Envez cu Gabinete Eman cumpli mesora door di kita e 3% di BBO, baha costo di bida, aumenta y redobla pensioen di viehez, paga indexering na e empleadonan publico, kita schoolgeld/boekenfonds, baha tarifa di awa y coriente, AVP ta castiga pueblo cu aumento di prijs di gasolin cu 8 cent y diesel cu 10 cent. Ora gasolin subi durante Gabinete Oduber, ta pa culpa di MEP, pero awor bao di Gabinete Eman nan no sa di unda tur e aumentonan aki ta bin! AVP awor kier tira santo den wowo di pueblo cu e issue di obesidad, unda cu e pueblo bon comi, segun AVP, awor mester ser controla kico nan por come of laga di come pa kita atencion di e problemanan real di nos comunidad. Fuera di mendiga caba pa placa cerca Hulanda, yora cu no tin placa, awor nan bishitanan na e proyectonan entama door di Gabinete Oduber ta na orden di dia. Ta pesey tur caminda ta ser bisa caba cu Gabinete Eman ta un gobierno di ni fu ni fa. |
