|
GOBIERNO A SUCUMBI PA PRESION DI HULANDA CU “GESCHILLENREGELING" DEN STATUUT? |
|
Wednesday, 18 November 2009 |
|
FRACCION DI MEP DEN PARLAMENTO:
PREGUNTA NA GOBIERNO DI AVP RELACIONA CU E HECHO CU: 
STA. CRUZ -- Fraccion di MEP den Parlamento recientemente a tuma nota di un acuerdo logra durante reunion di Conseho di Minister di Reino, caminda a keda introduci un areglo den caso cu tin diferencia di interpretacion riba e Statuut, e asina yama “Geschillenregeling”.
 Den pasado gobierno anterior (MEP) a propone pa ancra e areglo aki den e Statuut mes; esaki pa ta sigur cu e asunto aki ta ser regla na mes momento cu e cambionan di Statuut bin na vigor. Hulanda no a bay di acuerdo cu esaki y a cambio a bin cu un contra proposicion cu ta encera cu lo por regla e asunto aki por medio di un Rijkswet. Esaki ta un proposicion hopi mas debil y sin ningun siguranza cu e areglo aki lo bin mes den futuro. Awor aparentemente gobierno a cera un acuerdo cu Hulanda, pero Parlamento no a wordo informa debidamente di e acuerdo aki. Debi na esaki fraccion di MEP a haci preguntanan na gobierno. Gobierno a sucumbi pa Hulanda? Entre otro e fraccion kier sa kico ta e palabracionnan exacto di e acuerdo. Principalmente e fraccion di MEP kier sa si Gobierno a insisti riba e proposicion di gobierno anterior cu e “geschillenregeling” mester ser ancra den e Statuut mes. Un otro alternativa ta cu ta palabra cu lo bin un “geschillenregeling” den un Rijkswet (“een geschillenregeling wordt ingesteld”), y cu esaki mester sosode hunto cu e cambionan di Statuut. Of, e fraccion ta puntra, gobierno di AVP a sucumbi pa e presion di gobierno Hulandes, y a palabra cu lo por introduci un “geschillenregeling” den un Rijkswet (“een geschillenregeling kan worden ingesteld”)? Finalmente e fraccion a pidi pa ricibi tur e documentonan al respecto.
Sr. Paul Croes: Pa loke ta trata expresionnan di sr. Croes (AVP) e fraccion ta corto: grandeza di un politico ta pa admiti e berdad. E ”geschillenregeling" no ta algo cu gobierno di AVP a bin cune. E ta basa riba e proposicion cu gobierno di MEP a bin cune. Pero pa fraccion di MEP no ta importante ken su logro e ta, pero importante ta cu un areglo asina a wordo crea, cual ta un paso pa por defende nos autonomia. "Unico cos cu nos mester sa, ta si e areglo ta existi caba, of si ainda Hulanda por pospone e ehecucion di e "geschillenregeling". Principalmente fraccion di MEP kier haya sa si gobierno di AVP a sucumbi pa presion di Hulanda. |
