Mike Eman cu su medionan comprometi a ofende, insulta, acusa tur hende cu a negocia cu gobierno di M.E.P. y ora e no por a logra e tabata yama nan tur pa hendenan corupto te den nan wesonan. E tempo ey ni Camara di Comercio ni ATIA, ni AHATA, F.T.A a bisa algo na  defensa di progreso di nos pais. Alcontrario nan tur tabata defende bagamunderianan di AVP. Nan tur tabata hunto cu Mike Eman y tabata di acuerdo pa den koor acusa tur hende. Hasta e huelga pa opone B.B.O. a ser organiza pa e grupo ‘Nos cu Nos’ cu ya a ser privilegia cu su nombramento den puesto di cuminza papia y no haci nada. Ken no ta corda con ATIA, Camara di Comercio, AHATA, F.T.A. a opone B.B.O. pa awe cu nan tambe a bolbe ser engaña - cu envez di entrante 1 di November 2009 kita e 3% di B.B.O. - ata Mike Eman ta introduci e B.B.O. di A.V.P. y su 12 secuasenan di 1.5% cu segun A.V.P. ta pa castiga pueblo, pa haci Aruba mas caro, pa crea mas pobreza etc. Si e 3% di B.B.O. tabata asina devastador, kit’e anto, pasobra boso so tin 12 lastrador di garoshi den Parlamento. Si e 3% di B.B.O. lo a castiga pueblo, ta ki castigo Mike Eman ta introduciendo di 1.5% di B.B.O.? Di con e Kid Polis di ciudad hunto cu ATIA, Camara di Comercio, F.T.A. no ta organiza protesta  y huelga contra e B.B.O. nobo - cu yama  Carbachi pa pueblo! - di Mike Eman como recompensa pa vota pa A.V.P.? Mike Eman, bo a gaña, manipula y instiga cu e 3% ta castigo, ta un crimen contra pueblo, awor cu e 1.5%, kico e ta anto? Esaki yama tuma pueblo humilde pa chambon y hunga cu nan consenshi. Nos di M.E.P. cu nos 20.000 votadornan lo no sinta keto, laga e dictadura di capitalista y mayoria trapa ariba nos y sigui bay. Mike Eman cu e mesun midi cu abo a midi nos, bo lo ser midi, pero na milimeter. Mescos cu na aña 1985 Henny Eman a gaña pueblo pa e bay den gobierno cu e lo kita e 8.2% di Impuesto di Solidaridad mescos su ruman chikito Mike Eman ta haci cu pueblo. Mike keda pendiente pa e reto cu bo ta haci pueblo!