Awor envez di Duke Croes tin un tal Alexander cu diripiente a haya briyo y kende ta kere di por tuma pueblo haci. Por ta tin hende cu bao di cierto condicionnan toxico ta ser forza ta skirbi locuranan, ya cu bo ta puntra bo mes cu si nan sa cu ta nan partido A.V.P. ta na mando y no MEP! Te ainda e klompinan di salo cu ta goberna nos pais no sa ainda cu ta nan ta den gobierno, eligi pa goberna y no pa sinta hunga domino cu voluntarionan y ta yora tur dia cu cos ta malo na Aruba. Fuera di persigui nos votadornan, e ministronan mediocre di AVP ta sin vision y sin rumbo! Ora bo mira e lista di promesanan di A.V.P. pa gana eleccion, unda primeramente ta priminti di lo kita di inmediato e 3% di B.B.O., anto ya a cuminsa gaña, ta ki lo spera nos. Kico a resulta awor?  Mike Eman cu su 12 muchanan manda den Parlamento ta bay introduci un B.B.O. nobo pa castiga pueblo. Manera nan mes a bisa, e 3% aparentemente ta un medida cu lo ta castigando e pueblo. Esta gaña, manipula, hunga cu consenshi di un pueblo! Cu e votadornan di A.V.P. ta guli e pildo aki ta nan cuenta, pero pa nos di M.E.P. esaki ta e comienzo di sembra biento pa despues cosecha orcan. Esaki si ta 100% gañamento formal! E otro 100% gañamento ta cu ta Gabinete Oduber tabata  aumenta gasolin y diesel pa castiga pueblo. Hecho ta cu AVP apenas un luna den gobierno ya nan a aumenta gasolin cu 8 cent pa liter y diesel cu 10 cent. Awor si e muchanan di A.V.P. no ta grita cu nan ta castiga pueblo, cu costo di bida a subi etc. Segun Mike Eman pueblo ta bobo cu nan no ta comprende e cosnan aki. Segun A.V.P. nan ta manda awor y ta haci locual nan kier. Un otro 100% di engaño ta e cantidad di activistanan ya poni rond di e ministronan unda ta yen di pensionado cu 2 y mas entrada.