|
A.V.P. sinonimo na ilegalidad! STA. CRUZ -- Den Rapport De Ruiter traha pa gobierno Hulandes ta poni bon cla cu Gabinete Eman di Henny Eman nunca a respeta nos leynan, a trapa riba nos leynan y cu nan a mete den husticia, den Ministerio Publico y den Cuerpo Policial. E ministro di husticia di A.V.P. directamente tabata dicidi cual polis mester haci cierto trabaonan, laga hende cu ta cera sali for di den K.I.A., manda carta cu ordo pa Procurador General, exigi pa Director di Seguridad Nacional cu mester dune lista di ken ta tap nan telefoon etc.
Ultimo Hulanda a gaña rabia y a pone AV.P. kita dos hefe di polis Arubano y pusha nan cu polis Hulandes/Europeo cu deliberadamente a laga e cuerpo aki na werki. Hasta Hulanda a manda yama Henny Eman hunto cu gobierno di Antiyas pa mete completamente den nos Ministerio Publico. E mala maña di familia Eman a continua, ora cu Henny Eman como Promer Ministro a manda un carta pa un huez na Florida cu yama ‘Ungaro’ pa yuda un activista di nan meti den traficacion di droga y labamento di placa. E Ministro di Relacion di Exterior di Hulanda Hans van den Broek a manda Henny Eman un ‘handbrief’ pa e no mete nunca mas cu husticia Americano y a yama gabinete Eman “errand” boy, esta loopjongen di e cartelnan Colombiano, unda tur siman e hefenan tabata pasa na Aruba y reuni cu dirigentenan di A.V.P. den e tempo ey Americana Hotel. Esaki ta para literalmente den varios rapport di droga ‘Narcotics Strategic Control’. Si mester ta bolbe publica nan. Awe ata un polizonte di Trinidad ta manda carta pa ordena huez pa manda ariba nan te dia cu nan formula nan maneho, algo increibel cu nunca a sosode antes den Reino Hulandes. Como sifuera no ta basta, ata Mike Eman na Hulanda ta declara tur ilegal pa hendenan liber y como recompensa cu nunca nan a paga belasting A.O.V./A.W.W./A.Z.V. etc. ta duna tur un pordon general, anto e imbecil aki no sa mes cuanto tin na Aruba, pero si ta papia di 15 aña, anto ta con ta controla esaki si nan no ta registra ningun caminda? Mike Eman por tuma su hendenen haci, pero no e demas votadornan cu ta mas cu e votonan di AV.P. cu no a vota pa haci e fechoria y bagamunderianan aki. Normalmente pueblo ta duna un gobierno 100 dia, pero den 30 dia mes tin e desasternan aki, corda den 100 dia nan lo a masacra e pais aki completamente. |
