Baba Herde mester manda un señal cla y raspa pa su gobierno:

   

STA. CRUZ -- Cu partido AVP ta un partido yoron, esaki a keda demostra durante e ultimo simannan di gobernacion di e partido aki. Alavez tur santo dia bo ta haya politiconan mediocre, manera un tal Baba Herde of un tal Alexander Tromp ta scupi nan gal berde y vies contra partido MEP, lubidando di conta pueblo cu  durante e campaña ultimo nan a priminti cu nan lo tin solucion pa tur problema cu ta existi den e pais aki. 

Nos por a lesa entre otro con e tal Baba aki tin simannan largo ta yora y sclama riba e deficit di 96 miyon florin cu a wordo presenta den e presupuesto supletorio y cu finalmente a wordo acepta unanimamente den Parlamento siman pasa. Baba Herde mes a declara publicamente cu gran parti di e deficit aki di 96 miyon florin ta ocasiona pa e recesion mundial cu tambe a afecta Aruba seriamente. Pero den e mesun rosea e elemento aki ta tira tur culpa riba Gabinete Oduber y ex-Minister di Finanzas Nilo Swaen pa cu e deficit aki. Aki ta demostra claramente cu Baba Herde no tin weso di lomba pa acepta cu e problema di e deficit aki mester wordo soluciona pa su gobierno mediocre cu e ta sostene den Parlamento, ya cu ta nan mes a bisa den campaña cu partido AVP hunto cu e ‘Don Sabelotodonan’ di fundacion FESCA tin e habilidad pa soluciona tur problema den e pais aki. Sinembargo locual Baba Herde y e otro marionetanan den partido AVP no ta conta pueblo ta e deficitnan monstruoso cu Gabinete Eman III a laga atras na final di nan gobernacion na 2001. Y e deficitnan aki no tabata ocasiona e tempo ey pa ningun recesion of crisis mundial, ni e tempo ey tabata tin e asunto di ciere temporal di e refineria na San Nicolas.

Riba e tabel adhunto por mira con e gobierno manipulador di Baba Herde a gaña henter e comunidad Arubano cu e presupuesto di 2001 lo sera cu un saldo positivo, esta un SURPLUS di 1.5 miyon florin. Pero kico a resulta despues cu a haci un analisis door di e Comision Financiero 2001-2005? E desaster financiero cu e gobierno di AVP a laga atras tabata un DEFICIT astronomico di -167.8 miyon florin. Igualmente ta conta pa e presupuesto 2002 cu Gabinete Eman III tambe a laga atras cla pa aproba. E manipuladornan di AVP a bolbe gaña pueblo cu presupuesto 2002 lo cera cu un otro SURPLUS di 5.7 miyon florin, pero despues a resulta den un DEFICIT mas astronomico ainda cu 2001, esta di -206.3 miyon florin. Pues den 2 presupuesto (2001 y 2002) laga atras pa Gabinete Eman III tabata tin en total un DEFICIT di -374.1 miyon florin, cu Gabinete Oduber III mester a busca un solucion pa e desaster financiero aki. Y nos gobierno di MEP cu tur honor a logra, aunke cu nos a haya den nos caminda hopi otro contratiempo manera e guera di Irak, 9/11, crisis petrolero, SARS, e asunto di Nathalee Holloway, prijs astronomico di crudo di 147 dollar pa bari etc. Pero kico nos ta mira awe? Un Baba yoron tur dia ta yora manera un mucha chikito cu su gobierno di AVP ta sinta cu un deficit di apenas 96 miyon florin y cual deficit ta causa grandemente pa e recesion y crisis mundial. Hecho ta si un gobierno di AVP cu ta pretende hopi pero no por haci nada y no por soluciona e deficit financiero aki, mihor cos cu nan por haci ta di ‘get off the pot’, bay cas pa caba y laga un otro gobierno di otro signatura demostra con nan si tin e capacidad pa soluciona e problema aki. Hecho ta cu Baba Herde a resulta no solamente chikito den estatura, pero tambe chikito den capacidad y inteligencia pa trece solucion pa e deficit di 96 miyon florin aki. Por ultimo, nos tur por corda ainda e yoramento formal – sin ningun motibo ! - cu tabata tin den Cas di Cultura aña pasa, caminda Baba y Mike sam sam tabata den braza di otro yorando formalmente. Awe nan tur dos ta den e mesun yoramento pa cu e deficit di 96 miyon florin. Anto ainda nan kier rabia, ora nos di MEP yama nan pa un set di yoron politico!