|
STA. CRUZ -- Bo ta mira cu AVP a recruta un paar di lastrador di garoshi cu por ta nan sa con pa bende auto, cuida edificionan di gobierno, piki clabo den e refineria of gamble den casino, pero di finanzas publico nan no sa nada nada. Mike Eman a busca atrobe un Hulandes Europeo como su homber di confianza ariba tereno financiero, pasobra e no ta confia ningun Arubiano, mescos su man drechi pa haci sushedad politico, tambe ta un pensionado Hulandes Europeo, kende ya ta goza di 2 pensioen plus su salario di mas di f. 20.000,00 pa luna plus yen di beneficionan.
Mike a busca tambe e polis fracasa Hulandes Europeo cu a laga e cuerpo y su imagen na werki como su consehero. Activistanan di AVP ta bisa, pasobra el’a yuda nan tempo di investigacion etc. Mike Eman a manda su lastrador di garoshi ataca MEP na e nivel mas abao cu ta posibel y tur dia menaza nan cu nan lo cera yen di hende etc. Mike Eman a manda su secuasenan pa bay papia di presupuesto y ley di comptabilidad pa desvia atencion cu den 1 luna di gobernacion AVP a aumenta ya caba gasolin cu 10 cent y diesel cu mas di 10 cent etc. E incapacidad pa goberna, tin e ministronan di AVP cu ainda nan no sa cu ta nan ta gobierno y a bira tempo pa goberna nos pais. Pa tur problema nan ta man mara. E refineria tur cos tabata un engaño cu PEMEX, Radisson, Arubian Resort, B.B.O. no ta kite, pero a priminti di bahe cu 1.5%, pero prijs y costo di bida tur cos ta keda mescos, unda e ministro Digicel a declara cu si bo drenta un tienda cu ta caro, bula den auto y bay cumpra otro caminda. AVP na 2001 a laga e presupuesto di 2001 y 2002 cu deficit di casi 400 miyon florin. Laga nos no papia mes di con a atrapa ley di comptabilidad cu compra di e radar di 23 miyon florin na un forma corupto, e compra di computernan di ATES sin nunca a pidi otro oferta, e ‘ofertanan’ ficticio den e escandalo di 50 miyon florin di Fondo Desaroyo Nobo SN, e proyecto fantasma Race Track , unda AVP a lubida cu tin un ley di comptabilidad, e venta corupto di Bushiri, unda cu a benta un oferta di 28 miyon un banda pa cumpli cu Opa di un ministro. Lo ta bon Mike Eman conta e bendedor di auto, e watchman di C.E.A y e charlatan den enseñanza, esta e Donald Duck di AVP ta con nan a traha presupuesto na 1995-1996-1997-1998-1999-2000-2001 y 2002 cu nan a laga atras. E tempo ey e hendenan cu ta conseha e ministro di AVP di Finanzas tabata un goochelaar, un mago den cifras. E ta un berguenza pa inteligencia di nos pueblo ora bo tende un nivel di mercado di purga o bendemento di auto bao palo di hendenan cu a kere cu den politica bo ta nace ta cana y papia. |
