Partido AVP convirtiendo Lotto pa Deporte den un fierno completo!

STA. CRUZ -- Ken por a biba pensa ora cu un pais cu nos Arubianonan a lucha hopi aña pa nos mes por goberna nos pais, awe hendenan naci otro caminda ta trapando tur dia ariba nos. Nan ta bisa cu ora bo brinda hende hospitalidad y e haya poder, e ta abusa di dje. Bo ta mira esaki na varios di e ministronan di AVP cu tin odio y venganza contra e Arubianonan, pasobra nan ta stima nan pais y nan ta MEP. Un di esnan naci na Curaçao  ta convirtiendo Lotto pa Deporte den un fierno completo y kende tur dia ta papia di tene un audit aki aya pa yuda companianan amigo pa gana placa riba lomba di pueblo.

Gobierno di e Arubianonan di MEP a funda Lotto pa Deporte, unda e meta primordial tabata pa haya fondo pa yuda deporte den tur sentido di palabra. Gabinete Eman a trata caba na 1994 pa caba cu Lotto pa Deporte, pero no a logra den nan intento diabolico. Gabinete Eman III a bolbe purba na 2001 pa caba cu Lotto dunando e mentiroso structura y organiza, esta e doño di e papelucho sushi un permiso pa un otro Lotto pa yena su saco, mirando cu Merca a pone un fin na labamento di placa y traficacion di droga. Danki na resultado di e eleccion di September 2001, unda MEP a logra 12 asiento y AVP a haya e sota y derota unico y historico (12-6) cu Gabinete Oduber a kita e permiso duna na e mentiroso, e homber ‘M’ cu ta sufri di Mitomania, esta gaña y lanta falso testimonio contra integrantenan di MEP. E mentiroso aki cu su abogado Kid Digicel a bay 8 vez huez y huez a bati malamente riba su dedenan largo y a dicta sentencia cu e permiso tabata duna contra ley. Awe atrobe un otro Eman, esta Mike Eman a dicidi cu e hunto cu Mike de Meza ta bay caba cu Lotto pa Deporte, pasobra nan ningun di dos no a hunga ni kiniki ni domino  tempo di school, corda pa sa kico ta deporte y stim’e. E persecucion politico di e Arubianonan nobo den directiva di Lotto, unda ta acusa  tur hende den Lotto cu ta MEP, pa ladron, kitando pan for di nan boca tin precedente y consecuencianan grandi pa politica aki na Aruba. Nos lo tene Mike de Meza, Mike Eman y AVP responsabel pa locual ta bay bin. E buraco cu bo ta cobando pa nos di MEP, boso mes lo cay aden y e midi cu nos hendenan ta ser midi tambe lo ser aplica riba boso. Boso a yora na 2001 cu nos a kita boso hendenan for di trabao, pero ta Henny Eman mes a laga Departamento di Personal manda un carta dia 30 di Oktober 2001 pa tur e activistanan di AVP bisando nan cu nan a ser nombra pa Henny Eman pa traha solamente durante su periodo. Pesey mas cu 90% di nan cu a bay huez a perde nan caso. E odio y venganza cu Mike Eman, Mike de Meza y e tal Otmar ta practicando hamas lo ser lubida pa nos, corda pordona. Durante e 8 añanan di Gabinete Oduber, pushi y cachonan di AVP a ser nombra na granel y nos a laga nan traha, manera na DOW, DBB, Finanzas, KIA, Ontvanger, Douana etc. E candela di fierno cu Mike de Meza a cende den Lotto pa Deporte hamas lo ser paga pa nos. Nos ta tene e payasonan cu ta cooperando cu e persecucion politico aki tambe mes responsabel. Pero si bo hendenan mes a bin di exterior, ser permiti pa bira Hulandes, biba bon, nos no a spera e trato aki. E persecucion politico cu Mike Eman a start por dura 1 aña, 4 aña, pero hamas mas largo. MEP ta prefera muri ariba pia cu biba na rudia di traidornan di nos lucha cu a vota contra nos himno, bandera, moneda, Banco Central y nos libertad.

“Mike Eman, dal bay cu bo pasonan pa converti e aparato gubernamental y e institutonan di gobierno den un fierno, Cende un candela no ta un arte, pero sa di pague ta otro arte”.