ALVIN MOLINA

 

Alvin Sigmar Charles Molina, 46 – a  nace na San Nicolas y for di chiquito e la bay biba na Hulanda cu su mayornan. Cu 18 aña Alvin a bin biba bek na Aruba, despues di a caba VWO na Colegio Arubano, e la bay bek Hulanda na unda Alvin a studia na Nederlandse Politie Academie na Apeldoorn pa bira inspector di polis. Alvin a ricibi un tesoro na teoria, practica y experencia cu a forme pa sirbi su comunidad como polis. Alvin tin 23 aña trahando den Cuerpo Policial Aruba unda ela eherce diferente funcion entre otro; projectleider na Recherche Samenwerkingsteam (RST) unda a haci investigacionnan grandi hunto cu recherche di Hulanda. Alvin tabata e prome teamchef di e team di aresto di Aruba, hefe di districto San Nicolas di 2012 – 2018  y desde mei 2018 Alvin ta hefe na districto Oranjestad. Semper Alvin a duna e miho servicio posibel na su coleganan y comunidad.

 

Alvin ta tata di 5 yui, 2 yui muher y 3 yui homber. Su yuinan ta su motivacion pa ta e miho persona cu e por ta. Alvin tin un fe grandi den Dios, e ta hende di tur hende, cu un caracter social y cu un pasion grandi pa sirbi comunidad di Aruba y pa haci trabou boluntario. Alvin su mayornan a lante cu norma y balornan fuerte y a guie pa ta un persona humilde, honesto, y trahado. Alvin ta determina pa realisa su vision, esta pa yuda crea un Aruba unda husticia ta prevalece pa tur, un isla mas sigur y a pesar di nos diferencianan, nos por colabora pa un greater purpose Alvin ta un miembro, fundado y ex presidente di Kiwanis Club of San Nicolas.

 

Alvin ta practica fitness cu su yiu y den tempo liber Alvin gusta pasa tempo cu su famia. No por keda sin menciona cu den pasado Alvin a yega di forma parti den diferente agrupacion musical. Na 3 ocasion Alvin a participa na “Caiso & Soca Monarch” caminda e la contribui cu su talento pa engrandece cultura di Aruba. Alvin a participa den diferente produccion cinematografico produci door di pa nos talentonan local. Ta di remarca cu Alvin tin afinidad cu construccion danki na su famia y amigonan cu a siñe e trabou aki for di un edad hoben. “Alvin likes to construct, make things better than they were before”.

 

Alvin su pasion pa sirbi nos comunidad ta e motibo pa drenta e arena politico, pa asina yuda salvaguardia un bon futuro pa Aruba, nos yiunan y generashonan despues. Alvin su deseo ta pa cada dia por yuda aumenta e seguridad mas y mas. Pa logra esaki Alvin ta enfoka riba servicio, colaboracion y husticia. Servicio, di gobierno na su departamentonan, di hefe di departamento pa nan coleganan, di ambtenaar na pueblo. Colaboracion, entre departamentonan di gobierno, sector publico y priva, Aruba y reino. Poniendo tur esey riba e balance di husticia, traha pa hende ricibi loke nan merece, na un manera transparente y integro.

Esey ta Alvin Molina, candidato number 10 ... together we will rise!