Mi nomber ta Aldrin Lampe y mi ta naci riba 16 di september 1995, pues mi tin 29 anja di edad.

Den e bario di Papilon mi a crece den un cas den cual norma y balor semper tabata y ainda ta hopi importante. For di chikito mi tata Mirto Lampe, of mihor conoci como Ricki, y mi mama Lorena Lampe a sinja ami y mi ruman muher Aureen pa respeta un y otro. Cu un tata Rubiano y un mama Colombiana nos a lanta den un cas unda color ni nacionalidad no a hasi un descrepancia den con pa trata otro. Mi mayor nan semper a corda nos for di unda nos a bin, esta un origen humilde. Nos a sinja cu ta bo mes y traha duro pabo meta nan ta hiba bo unda bo kier ta para den bida.

Jong y inexperiencia pero cu hopi balentia y cu gana di bai dilanti, mi a subi avion na anja 2013 rumbo Hulanda despues di a caba mi vwo aki na Aruba pa asina mi sigui studia. Mi a bai biba Nijmegen unda mi a studia Economie en bedrijfseconomie na Radboud Universiteit. Mi a scohe Finansas como mi specialisacion. Tambe mi a hasi un minor den fiscaal economie, fiscaal recht, international management y negotiation and peacemaking.

Ta na Nijmegen mi a conoce mi pareha, Dyanne Timmermans. Un motivando e otro, nos a pasa nos studententijd. Den e tempo aki nos a biaha pa differente caminda den Europa pa asina hunto disfruta di e diferente cultura nan, amplia nos conocimiento di e pais nan aki y nan cultura y alavez amplia nos mindset over di diferente topico nan.

For di nos bunita relacion a bin dos yui alegre y energetico cu ta bolter nos mundo boca abou den e mihor manera: un mucha muher di 5 anja y un mucha homber di 2 anja. Mi ta dedica tempo na mi yui nan pa asina nan semper sa cu nan tata y mama semper tey pa apoya, guia y motiva nan. Nos gusta bai Neptali park pa nan por hunga, Linear park pa nan por core step of bais, arcade of lama.

Mi ta un persona hopi familiar. Si mi no ta na cas pasando tempo cumi famia, bo ta hanja mi na cas dimi mayor nan unda henter e famia ta reuni regularmente. Si mi no ta cumi famia, bo ta mira mi riba veld ta hunga futbol pa Estrella division di Honor, pa cual mi a cuminsa hunga futbol cu 4 anja, of ta train e mucha nan di Alpharunners of ta core banda di caminda. Por bisa cu mi ta un deportista di curason. Recientemente mi ta forma parti di e fundacion Beyond Sports Limit, cu ta un fundacion cu ta stimula e acceptacion y inclusion di athleta nan special den differente deporte nan. Mi ta di opinion cu tur hende por practica un deporte, tin biaha mester djis un helping hand of un persona cu ta motiva bo.

Na anja 2020 mi a bolbe Aruba como un young professional. Na SVb mi a hanja e opportunidad pa traha den un momento dificil pa hanja trabou, esta den pleno pandemia. Mi a cuminsa prome como projectmedewerker y den 3 luna di tempo mi bira un risicomedewerker. Mi funcion tabata pa controla, suministra y administra e proyecto di loonsubsidie hunto cu un collega. Durante e temporada aki mi a encontra hopi reto den mi trabou den e ramo di seguridad social. Esaki a hasi mi curioso y na mesun momento a motiva mi pa specialisa y asina rekeri mas conocimiento den e area aki. Den mi 4 anja nan na SVb mi a hanja e opportunidad pa sigui differente curso nan y tambe hasi un estudio den seguridad social unda mi a obtene mi diplomado di tecnica actuarial pa seguridad social.

E anja aki mi ta postula mi mes den e arena politico pa prome biaha pa asina demonstra nos hoben nan cu si nos kier mira innovacion, evolucion y cambion nan positivo den politica y otro area nan, nos tin cu tuma e curashi to make our voice count. Nos tin cu dal un stap pa dilanti y demonstra cu nos tambe ta capacita pa yuda hiba Aruba pa dilanti. No sinta warda pa otro hende trece e cambio nan.

Be the change you wish to see on the island!

Innova, Inspira y Impacta!