Ami ta Rodymar Edgar Geerman Rody of Rody-G manera amistadnan y famia ta referi na mi persona. Mi tin 38 aña y mi ta casa, mi tin 1 yiu homber y tres yiu muhe. Mi ta stima mi famia! 

Un hoben di pariba di brug, lanta durante mi niñez den 2 diferente bario Noord Cura Cabay y Sabana Basora.

IBiSA a otorga mi e chens pa por expande mi mes mas. Mi amor pa deporte a wordo combina cu enseñansa pa asina a duna mi e posibilidad pa sigui desaroya mi mes y educa mi mes mas pa por structura y guia nos muchanan. 

Cu hopi sacrificio y 5 aña despues oficialmente mi por bisa nunca no ta laat pa studia y sigui bo soño. Mi a gradua na july 2020 como docente di Movecion y Salud (Gymdocent).

E estudio di Movecion y Salud a yuda mi pa por guia nos hobennan cu ta nos futuro pero tambe expande mi mes den mas area y oportunidad na IBiSA desaroyando ideanan pa uza e combinacion di enseñansa y deporte (movecion) pa asina crea proyectonan pa hoben, adulto y tambe pensionadonan por mantene nan mes na un bida mas saludabel. 

Deporte ta un gran parti di mi bida y mi tin e privilegio di ta eherce un trabou cu mi ta sinti mi por haci un diferencia y ta sinti cu mi experiencia lo por duna mas den e ramo di enseñansa y deporte. 

Aruba no ta pasando door di su miho momentonan. Pero un cos si a resalta ta cu Aruba tabata tin un team sublime den gobierno cu un Pal’i muhe como MinPRES y un Muhe di hero como MinFEC cu aunke con duro cos tabata a sa di tuma e miho decision pa Aruba y bienestar di su hendenan durante e temporada di e pandemia aki. 

Esey ta e team cu ami kier ta parti di dje pa hunto cu mi coleganan haci un diferencia. Ami tambe kier t’ey pa mi isla! Humilde, Responsabel, Energetico, Detayista y Analitico, mi ta determina den mi metanan. Como hoben profesional mi ta cla pa un reto nobo!

Cu bo nos ta Avansa. P’esei dia 25 di juni cu bo sosten, vota Rodymar. 

Paso E arma mas poderoso pa un bon futuro ta un mente y curpa sano. Deporte y Enseñansa ta mi prioridad!