Informacion Personal como Prologo

Mi nomber ta Louisette Christiaans-Yarzagaray pero mi ta conoci mas tanto bou e nomber di Setty. Mi ta naci na aña 1971 y ta un mucha di Sta Cruz. Nos famia a biba den area di Conny Francis pero despues mi mayornan a dicidi di traha cas banda di otro famianan y a biba desde esey mas cerca di cero di Canahito na Sta Cruz mes.

Mi ta yiu mas chikito di Augustin Yarzagaray (di Paradera) cu a traha na Lago y di Luisa Werleman (di Kas Ariba) cu tawata traha na hospital San Pedro pero desde cu mi prome ruman a nace, a bin cas pa wak pa nos su yiunan y ta ruman di Poy Werleman.

Premirando e cierre di Lago, mi mayornan a bin na e idea pa lanta un farm bou nomber di Aruba Farm Supplies cu despues a bira Canashito Farm Supplies asina yudando na a area di cria pero tambe plantacion den Sta Cruz y Aruba henter. Nos a cria diferente bestia, manera galiña, cabrito, carne, porco, abeha y hasta baca unda nos a distribui lechi di baca fresco y tambe carni fresco pa un tempo ademas di bende honing, mata y alimentacion pa bestia.

Informacion Educacion

Mi a termina tanto Mon Plaisir College, Colegio Arubano como Aruba Hotel School (Bushiri manera nos tawata yame) cu ta parti di mi estudio na Aruba. Mi a continua mi estudio na North Miami y na aña 1994 mi a termina mi Bachelor’s Degree y despues na aña 1996 mi logra mi Master of Science den Hotel & Food Service Management (Turismo) na Florida International University (FIU) na merca.

Experiencia di trabou

Mientras mi tawata studiando pa mi Master’s na Merca, mi tawata tin e oportunidad di traha na Aruba Tourism Authority (ATA) y a logra asina adkiri experiencia den e mundo di mercadeo y venta di Aruba como destinacion. Despues di a termina mi estudio mi a bolbe bek mi isla pa contribui cu mi conocemento. Mi a haya e oportunidad pa traha na Central Bureau Statistiek (CBS) desde 1996 te cu 2017. Aki a lanta e afdeling Turismo unda mi a haci enceusta den e industria aki pa midi y haya sa mas hopi posibel di nos bishitantenan. Nos kier haya sa kico nos bishitantenan ta pensa, nan demografia pero tambe loke nan ta laga atras na placa pa asina midi e impacto di Turismo na Aruba su economia.

Na banda di Turismo mi a fungi como director suplente pa mas di 10 aña na CBS adkiriendo asina conocemento aplio den diferente area di desaroyo di Aruba, manera su demografía, importacion, inflacion, finansas y economia, entre otro. Depues di 21 aña na CBS, mi a traha brevemente na Departamento di asuntonan Economico (DEACI) den e area di conseho di maneho.

Na aña 2013 mi a dicidi di subi un lista politico, afiliando mi mes na partido MEP. E dicision aki tawata basa mas tanto door di e pensamento cu mi conocemento di data, mi por contribui na decisionnan di maneho di pais Aruba mas dirigi riba e realidad di informacion mas cu djis sensacion.

Desde 2017 mi tin e honor di ta sirbi pueblo como miembro di Parlamento, unda mi ta hiba un politica serio, al caso, usando informacion como mi base purbando asina di eleva e nivel di politica na Aruba. Areanan cu mi ta domina mas tanto ta economia, turismo, finansas y metanan di desroyo sostenibel. Areanan cu mi ta papia mas for di mi pasion ta e problematica di cacho y pushi riba caya y su multiplicasion irresponsabel y tambe innovacion den e sector publico ademas di SDGs. Mi a atrega diferente mocion durante añanan riba e temanan ariba menciona (entr otro) y un cambio di ley cu mi ta trahando na e momentonan aki riba dj’e ta e implementacion di castigo mas severo contra abuso di mascota.

Informacion Personal como Epilogo

Na 1998 mi a contrae matrimonio cu Patrick Christiaans depues di a conoce otro pa mas di 7 aña y reconoce y compromete di ta dispuesto pa comparti un bida cu otro cu tur loke nos tin den comun pero tambe cu tur loke ta haci nos diferente. Asina nos ta gosa hunto di musica, unda mi ta canta mas di 30 aña den coro di misa y ta aporta na canto dedica na nos pais (mientras mi casa ta toca). Tambe nos ta disfruta di nos naturaleza na diferente forma, sea door di caminata den naturaleza, pisca of djis gosa di nos lama. Caminata y core bais sigur tawata hobbynan di nos.

Di nos propio matriminio, nos no tawata tin e oportunidad di e bendicion di Dios di un yiu propio, si no nos a ricibi un bendicion di un yiu di curason of yiu di criansa. Asina Kimberly a drenta nos bida 8 aña pasa, yenando un bashi den nos hogar y treciendo alegria y responsabilidad añadi na nos hogar cu hopi placer. Nos hogar ta consisti alabes di numeroso cantidad di mascota cu ta yega invita y sin wordo invita pero ta semper tur ta bon bini cu mil amor.

Ainda mi ta biba cu hopi placer den mi dushi bario di Sta. Cruz y mi tin sigur cu si Dios dunami bida y salud, lo mi sigui contribui na mi bario cuidando cacho y pushinan riba caya, cu mi canto como miembro di coro di misa di Sta. Cruz, dedica na canto na nos pais Aruba cu grupo tipico di Sta. Cruz of ken sa un dia atrobe door di canto di Dande pa pidi bendicion pa nos hogarnan di Sta. Cruz y pa Aruba henter!

Aruba