MIKE EMAN CONTRA BAHAMENTO DI LOON & INKOMSTEN BELASTING CUAL TA TRECE ALIVIO GRANDI PA PUEBLO SU CARTERA

Marco Berlis (MEP): MIKE EMAN CONTRA BAHAMENTO DI LOON & INKOMSTEN BELASTING CUAL TA TRECE ALIVIO GRANDI PA PUEBLO SU CARTERA.

Pa tres aña largo Mike Eman a papia den prensa y den Parlamento riba bestaansminimum, pobresa, cu poder di compra a bay atras, cu tur cos a bira caro y cu gobierno no ta hacienda suficiente pa trece alivio. Sr. Mike Eman, den tur su discursonan den Parlamento nunca tabata mantene su mes na e topico di e reunion publico, pero semper tabata papia di pobresa y medida.

Gobierno a baha loonbelasting tres biaha di 2017-2025

E intencionan di un reduccion di e loon / inkomstenbelasting a wordo anuncia basta luna pasa caba pa gobierno, cu e tempo ya no tabata demisionario. Nos mester corda bon cu eleccion mester a tuma lugar na Juni 2025 y no na December 2024. Esaki ta e añanan cu a reduci loonbelasting/inkomstenbelasting bao gabinete Wever-Croes I-II;

1. Tres biaha a baha loon belasting; E prome tabata na 2019, despues na 2023 y awo na 2025

2. Na 2023 a bahe cu 2% pa e prome dos categorianan. Ademas a subi e suma liber di impuesto di 28.861 florin pa 30.000 florin pa aña. Na 2025 pueblo a wordo informa durante e entregamento di e prespuesto di 2025 cu lo tin otro paketenan di alivio y inversion den pueblo.

3. Servicio di impuesto DIMP ta informa Januari 8 & 10 2025, riba su website/facebook cu e reduccion di loonbelasting ta lo siguiente; E reduccion di impuesto entrante 1 di Januari 2025 riba e prome categoria di entrada ta cero. Pues, den e prome paso e suma liber ta 30.000 y den e di dos paso, e tarifa ta cero te na un entrada di 34.930. Esaki ta nifica cu un contribuyente no ta paga inkomstenbelasting of loonbelasting si su entrada ta Afl. 64.930 of menos pa aña (30.000+34.930). Na momento cu e entrada surpasa e suma total di Afl. 64.930 pa aña, e contribuyente lo cuminsa paga sumanan minimo. Adicionalmente, Si e entrada ta Afl. 64.930 pa aña, e reduccion di impuesto pa aña ta Afl. 3.493. Esaki ta un averahe di Afl. 291,08 pa luna. Esaki ta significa cu tur contribuyente ta hayando un reduccion substancial di loonbelasting!

Mike Eman ta contra reduccion di Loonbelasting

Pa sorpresa di tur hende, riba Diaranson 15 di Januari, Mike Eman a sali ataca brutalmente e iniciativa noble di gobierno pa baha e loonbelasting pa pueblo! Despues di 3 aña y mei Mike Eman, e “campion” di pobresa ta condena y ataca un reduccion substancial di loonbelasting cu ta aumenta e cartera di pueblo directamente! Awo cu eleccion a caba y AVP a gana, Mike Eman ta mustra su cara berdadero? Mike a bira razo pasobra esnan cu ta gana AWG 60.000 pa aña tambe a haya alivio! Mike, acaso nan no tin e derecho pa mehora nan poder di compra? E “Defensor” di esnan pober awor a bira contra ayudo pa pueblo? E “Bon Comun” y e ley “Macro” di AVP no ta encera un reduccion di loonbelasting?

Den conclusion; Bahamento di loonbelasting no ta algo repentino ni algo nobo pa e gabinete Wever-Croes I-II. E ta un forma di incentivo fiscal cu gobierno a bin ta implementa structuralmente atraves di 7 aña di gobernacion responsabel, pa trece alivio den pueblo su cartera di un forma directo.

Si pueblo desea mas informacion di e articulo aki, contact mi na cel: 560-5755 of email mi na: marcoberlis@hotmail.com / Bo sirbidor di pueblo na bo ordo semper!