Parlamentario Marco Berlis (MEP):
Ser un parlamentario responsabel kiermen cu nos presencia na reunionan publico ta un obligacion, y cu realmente no tin un excusa pa no ta na pia di trabao sino pa enfermedad y cosnan di urgencia real. Sinembargo pueblo por a observa esnan cu mas ta critica, cuestiona y punta dede tur caminda, ta esnan cu menos ta atende trabaonan na Parlamento. Ausencia structural, yegamento laat mas cu un ora of dos ora, ta na ordo di dia pa Marisol Tromp y Miguel Mansur.
Aña parlamentario 2023-2024: Dikke onvoldoende pa Marisol y Mansur
Tur aña Parlamento ta publica e rapport di Parlamento di Aruba. E rapport aki ta informa pueblo riba e presencia y ausencia di parlamentarionan na reunionan (OV) y encuentronan publico (OB). Adicionalmente ta keda publica cuanto pregunta cada un di e parlamentarionan ta haci den un aña parlamentario. Esaki ta un parti remarcabel di e resultado:
· Ausencia structural di Marisol: Di un total di 29 reunion y encuentro publico e tabata ausente 11 biaha! Kiermen Marisol a briya cu su ausencia pa practicamente 40% di reunionnan! Abo lo por sinti bo bon representa pa un parlamentario cu no ta tuma su trabou na serio? E biahanan cu Marisol tey mes e ta sali frecuentemente di sala, y ora di votacion e ta sali y asina abstene di vota. Abo sa con importante un voto di un parlamentario ta durante un reunion, esaki ta e tipo di politico di poco prestacion y poco interes cu bo ta desea pa nos pais? No laga video y rueda di prensa gaña bo. Pregunta haci pa Marisol: 96.
· Ausencia structural di Mansur: Di un total di 29 reunion y encuentro publico e tabata ausente 11 biaha! Kiermen Mansur tambe a sa di briya cu su ausencia den sala. E no ta desconoci cu Mansur ta mas den avion cu e ta na Aruba. Trata leynan den sala di parlamento y debati manera ta keda spera for di su rol como un parlamentario sigur no ta su prioridad. Mansur conoci pa su arogancia, su hacimento di bofon y altives pasobra e ta miyonario y nunca tabata mester di nada. Su ausencia structural ta bisa mas di dje como parlamentario cu su presencia den sala mes.
Pa tur transparencia ami Marco Berlis a haci 383 pregunta na gobierno, y pa dos biaha consecutivamente mi tabata number un den e rapport, pa cuestiona gobierno, y nunca ma falta un reunion of encuentro publico.
Marisol ausente di un reunion publico cu e mes a exigi
Aunke tur reunion publico ta sumamente importante, ta bon pa remarca cu Marisol Tromp tin un ausencia halto pa 2023-2024. Asina Marisol a bay prensa pa “supuesto fraude” cu helicopter, acusando minister Rocco Tjon pa mal maneho y falta di transparencia. Marisol a exigi un reunion publico riba e topico, a manda un carta na Presidente di Parlamento pa trata e tema, a grita riba e tema den prensa, sinembargo ora e dia di e reunion publico a yega, Marisol tabata ausente! Asina importante e supuesto “fraude” aki tawata p’e.
Marisol ausente na reunion publico di Ombudsman
Recientemente tabata tin e reunion publico historico, den cual Parlamento mester a scoge entre e nombernan kende mester a bira e prome Ombudsman di Aruba. Un dia masha importante pa Aruba den cual publicamente a scoge e prome Ombudsman Jurima Bryson pa e posicion. Unda Marisol tabata e dia ey? Ausente atrobe!
Marisol den cushina di Parlamento pa Ley di TPEF no wordo trata
Awo e poco biahanan cu Marisol ta present’e, e ta scoge pa bandona sala. E tabata presente na Januari 2024 ora mester a vota den e reunion publico di TPEF (Tourist Product Enhancement Fund), cu ta wordo usa pa embeyece nos isla, pa financia proyectonan turistico y paga ploegnan pa tene nos costanan limpi. Pero kico Marisol a haci? El a bay sinta den cushina pasobra e no kier tabata presente den sala di Parlamento pa asina stroba e reunion publico di tuma lugar. Marisol su actitud irresponsabel ta keda demostra claramente cu e no ta luchando pa bienestar di nos pais, pero pa sigui campaña pa su imagen politico di 27 aña.
Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!
Comments