Riba Dia di Prensa, 1 di September 2022, hunto cu coleganan Edgard Vrolijk, Setty Yarzagaray, Ricky Hoek y Darlaine Erasmus, mi a asisti na e di 15 exposicion “Lens di mi wowonan”. Un exposicion cu pa motibo di Covid no por a keda organisa na aña 2020 y 2021 pero cu den 17 aña di tempo ta keda organisa y poni riba pia pa di 15 biaha. E motor tras di e exposicion aki ta sr. Leo Vrolijk, cu manera e mes a bisa durante su speech riba e anochi aki ta algo cu e ta haci cu hopi amor.
E aña aki tabatin en total 150 potret di diferente persona. Un anochi bunita caminda enberdad nos por a laga e potretnan conta nan storia. Diferente tema nos por a tuma nota ta keda trata den e exposicion e.o., deporte, cultura, Aruba y caranan di prensa. Tur aña e exposicion ta keda dedica na un of mas persona. E aña aki el a keda dedica na Rudolf Haseth y Jason Inesia. Tambe a keda otorga durante e anochi aki e Premio Rookie na Andrew Vrolijk cu sigur nos por a experiencia su crecemento den prensa.
Durante e anochi a hiba palabra Leo Vrolijk, Pierre Rafini di RBC, Astrid Britten di BNA y Minister Maduro. Tur na nan manera a elabora riba e importancia di prensa y e pakico nan ta aporta of contribui na e exposicion en cuestion.Sigur e ta tabata un anochi exitoso caminda hopi miembro di prensa tabata presente.
Pabien na señornan Haseth y Isenia y tambe na Adrew Vrolijk cu su premio Rookie. Felicitacion na Leo Vrolijk y tur otro persona of instancia cu a haci e di 15 exposicion “Lens di mi wowonan” posibel.
Comments