Parlamentario Ricky Hoek (MEP):
Parlamentario di Fraccion di MEP, Ricky Hoek, a duna di conoce cu for di 1 di januari 2025, lo introduci un salario minimo pa ora na Aruba, locual ta nifica un cambio importante compara cu e sistema actual di salario minimo. Esaki ta conta pa tur persona cu ta cobra un salario minimo. E idea pa introduci salario minimo pa ora a ricibi hopi sosten, tanto di e gobierno como di e dunado di trabou, loke ta un paso positivo pa crea un mercado di trabou mas husto.
Despues di 2 aña di investigacion door di CBS, DAO y SER a yega na un resultado positivo pa loke ta introduccion di un salario minimo pa ora.
Segun e estadisticanan, 76% di empleado cu ta ricibi salario minimo ta traha seis dia pa siman, cu un siman di trabou di 40 te 45 ora. E otro 24% ta traha cinco dia pa siman cu un siman di trabou di 40 ora. Cu e introduccion di salario minimo pa ora, lo tin un sistema mas husto cu ta refleha miho e variacion den e cantidad di ora cu ta traha.
Beneficio di un salario minimo pa ora
Un di e beneficionan principal di salario minimo pa ora compara cu salario minimo ta e flexibilidad cu e ta ofrece. Un salario minimo pa ora ta sigura cu empleado ta ricibi pago husto pa cada ora cu nan traha, sin importa e cantidad di ora pa dia of pa siman. Esaki ta trece beneficio pa e empleadonan cu ta traha hopi ora extra of cu tin orario di trabou mas flexibel.
Den e sistema actual, un empleado cu ta traha 45 ora pa siman por ricibi mesun
cantidad di un empleado cu ta traha 40 ora, a pesar di e ora extra.
Un otro beneficio ta cu e salario minimo pa ora ta duna mas claridad y transparencia tanto pa empleadonan como pa e dunado di trabou. Esaki ta facilita e proceso pa paga ora extra of trabou parcial riba un manera mas husto y eficiente.
Pa empleadonan cu ta traha part-time, cu por traha menos cu 40 ora pa siman, esaki ta nifica cu nan salario ta relaciona directamente cu e cantidad di ora cu nan ta traha, loke ta garantisa un pago mas husto.
Sosten di e dunadonan di trabou
Ta interesante tambe cu un gran parti di e dunadonan di trabou na Aruba ta di acuerdo cu e introduccion di salario minimo pa ora. Esaki por keda deduci for di consultanan tripartite cu SER tabatin, caminda cu tabatin representante di dunado di trabou, empleado y gobierno. Esaki ta mustra cu e regla nobo ta mira como un solucion husto y realisabel tanto pa empleadonan como pa negoshinan.
Na totalidad, e introduccion di salario minimo pa ora na Aruba entrante 1 di januari 2025 lo crea un sistema di pago mas husto y flexibel cu ta beneficia tanto empleadonan como dunadonan di trabou.
Esaki ta marca un paso importante den e desaroyo di un mercado di trabou moderno y inclusivo cu lo contribui na un mercado di trabou mas standarisa y transparente,
Parlamentario Hoek a declara.
Comments